«Ҳаҭыр зқәу атурнир зхы алазырхәо зегьы. Даара ҳаигәырӷьоит шәбара. Иахьа ҳара Аԥсны аԥкьаҭмпыл аҿиаразы акыр ирацәаны иҟазҵаз ауаҩы, Рубен Дилениан игәалашәара иазкны атурнир мҩаԥаагоит. Даара иаҳҭахуп шәара ари аҩыза ауаҩы бзиа есымша дышәгәашәаларц», - ҳәа иҳәеит Ҭамаз Абӷаџьаа.

«Аҿари аспорти русқәа рзы Аҳәынҭқарратә Еилакы ахьӡала Аԥсны зҽаԥсазтәыз азыҟаҵаҩ Рубен Артиом-иԥа Дилениан игәалашәара иазку атурнир аартра шәыдысныҳәалоит зегьы. Иахьа шәара абра шәахьгыло, уи зегьы иара иоуп изыбзоуроу. Иара акыр аԥкьаҭмпыл изааигәан, иара даара бзиа ибон ари аспорт хкы. Аманшәалара шәыцзааит, ақәҿиарақеи аихьӡара дуқәеи шәзеиӷьасшьоит!», - ҳәа илҳәеит Жанна Занҭариа.

Беслан Кобахьиа  аԥкьаҭмпыл аспортсменцәа рзы адунеитә арена ду ахь ацәырҵразы зеӷьаҟам лшароуп ҳәа иазгәеиҭеит.

«Даара гәахәара дууп ас еиԥш ирацәаны иахьа аԥкьаҭмпыл аҿы раԥхьатәи зшьаҿақәа ҟазҵо аҿар рбара. Шәара еилышәкаауазар ахәҭоуп, аԥкьаҭмпыл – ари адунеизегьтәи арена ахь ацәырҵразы зеиӷьаҟам лшароуп.  Уи зегьы шәара шәнапы иакуп,  шаҟа шәацԥыҳәаны шҽазыҟашәҵо аҟара ақәҿиарақәагьы шәзыԥшуп. Агәра сгоит, шәара зегьы шшәықәҿио», - ҳәа иҳәеит Баҭал Кобахьиа.

Артур Чакриан атурнир аиҿкааҩцәа иҭабуп ҳәа раҳәо, аԥкьаҭмпыл зегьы реиҳа иԥшааху акыр иԥшӡоу аспорт хкқәа иреиуоуп, уи агәрахаҵара, аспорттә хачҳара, аиндаҭлаҩ ҳаҭырқәҵарыла изнеира, уҳәа аҟазшьа шахәққәа уланааӡоит ҳәа инаҵшьны иазгәеиҭеит.

Саид Бебиа аспортсменцәа ақәҿиарақеи аманшәалареи аԥҟарақәа рықәныҟәареи рзеиӷьаишьеит.

Атурнир рхы аладырхәуеит ареспублика ақалақьқәеи араионқәеи рҟынтәи 77 – ҩык инарзынаԥшуа аспортсменцәа. Аицлабрақәа 9-10 шықәса зхыҵуа, 13 шықәсанӡа зхыҵуа, 17 шықәсанӡа зхыҵуа, иара убас аиҳабацәа рзы имҩаԥысуеит. Аицлабрақәа хаҭалатәиуп, урҭ  хаҿык ила инагӡоу ахәмаррала имҩаԥыслоит.

Атурнир хыркәшахоит цәыббрамза 10 рзы.  Ахәмаррақәа мҩаԥыслоит Арзамеҭ Ҭарба ихьӡ зху аԥкьаҭмпыл азы Ареспубликатә школ аҿы асааҭ 09:00 инаркны.

Аиҿкааҩцәа – Аҿари аспорти русқәа рзы аҳәынҭқарратә Еилаки Аԥсны аԥкьаҭмпыл Афедерациеи.