Аҟәа. Цәыббрамза 5, 2023 шықәса. Аԥсныпресс. Аҿари аспорти русқәа рзы аҳәынҭқарратә Еилакы аҿы жәларбжьаратәи апрофессионалтә номертә турнир К-1 ачемпион имаҟҿаҳәага занашьахаз, Аԥсны акикбоксинг Афедерациа ҭаҷкәымла аисратә клуб «Чемпион» ааӡамҭа Григор Оганиан иԥылара мҩаԥысит, ҳәа адырра ҟанаҵоит Аҳәынҭқарратә Еилакы асаит. Аспортсмен ааигәа, нанҳәамза 18 рзы Таиланд Акралра ақалақь Пхукете аҿы имҩаԥысыз К-1 азы апрофессионалтә турнир аҳәаақәа ирҭагӡаны имҩаԥгаз аиндаҭлара аҿы Германиатәи аспортсмен анакаут ахь дишьҭит.
Григор Оганиан зыкапантә категориа 71 кьыла иҟоу рыбжьара жәларбжьаратәи апрофессионалтә номертә турнир ачемпион имаҟҿаҳәага аиура иҽаԥсаитәит.
«Григор, уареи сареи ҳаибадырра агәахәара ду снаҭоит. Ҳара ааигәаӡоуп уқәгылара ателехәаԥшрала ҳанахәаԥшуаз, уаҟа уара умч-улшара ахьынӡаҳаракыз аабеит, 27-шықәса зхыҵуаз Германиатәи аспортсмен ииааира улшеит. Гәыкала иудаҳныҳәалоит иугаз аиааира. Ҳара ҳаигәырӷьоит уара зегьы ҳбираҟ ахьыдурбаз, ҳаспортсменцәа шаҟа азыҟаҵара бзиа шрымоу», – ҳәа иҳәеит Ҭарашь Ҳагба.
Иара аспортсмен иазыҟаҵаҩ Нико Сааков аспортсмен қәыԥш идибалаз аџьабаа азы иҭабуп ҳәа еиҳәеит, ами алшареи ахачҳареи, ас еиԥш иҟоу ааӡамҭацәа рацәаны изеиӷьаишьеит.
Аспортсмен иреспублика азы агәырӷьареи агәадуреи шинырыз азгәеиҭеит.
«Сара аиааира агара ахьсылшаз, среспублика абираҟ ари астадион аҿы ашьҭыхра ахьалыршахаз даара сеигәырӷьоит. Аиндаҭлара маншәаланы, ҳагәҭакқәа инарықәыршәаны имҩаԥысит», - ҳәа иҳәеит Григор Оганиан.
Нико Сааков ишиашоу ицо аефир ала ари аиндаҭлара данахәаԥшуаз игәгьы ԥшааит ҳәа иазгәеиҭеит.
«Сара даара сгәы хыҭхыҭуа уи аиндаҭлара сахәаԥшуан, избан акәзар Григор аиндаҭлараҿы маҷк агхақәа ҟаиҵон. Даара ишәарҭоу аҭагылазаашьа ҟалон, сара азыҟаҵаҩ иаҳасабала уи збон, исхьаауан. Анаҩс, Григор индаҭлаҩ данис ашьҭахь уи анакдаун ала дкаҳаит, усҟан сара маҷк сгәа сырҭынчит. Григор ари амомент ихы иархәаны аиндаҭлара еиҳа игәы ацԥыҳәаны иациҵеит. Сара уи ангәасҭа сыҽсырҭынчит. Сара ари аиндаҭлара аҿы Григор иаҵкьысгьы жәантәы исцәыуадаҩзар ҟаларын», – ҳәа иҳәеит Нико Сааков.
Аҳәынҭқарратә Еилакы аҿар рыҟәша аиҳабы Идрис Кара-Осман-оглы, Григор еиԥш иҟоу арԥарцәа Аԥсны ахьтәы ҿар рхыԥхьаӡара иалоуп ҳәа иазгәеиҭеит.
«Ҳара ҳаспортсмен ҿарацәа ахышыҩзышьҭрала ҳрыцклаԥшуеит. Григор ҳизгәдууп. Иара еиԥш иҟоу аҷкәынцәа излауа ала ирацәахароуп. Ақәҿиара дуқәеи аманшәалареи шәзеиӷьаҳшьоит», - ҳәа иҳәеит Кара-Осман-оглы.
Аиԥылара ахыркәшамҭаз Ҭарашь Ҳагба аспортсмен иҿыцу аихьӡарақәа изеиӷьаишьеит, анаҩс Аҳәынҭқарратә Еилакы ахьӡала аԥаратә ҳамҭа ианеишьеит.
