«Иаатит афотоцәыргақәҵа «Апоет имҩа». Иара иаанарԥшуеит ахҭысқәа рыла шаҟа игәылҭәааз Мушьни Таҷ-иԥа иԥсҭазаара. Араҟа иҟоуп иара иқәыԥшра, иҿара, истудентра аамҭа аазыԥшуа афотосахьақәа, иҟоуп еицырдыруа ашәҟәыҩҩцәеи аҳәынҭқарратә усзуҩцәеи акультура аусзуҩцәеи иареи реиԥылара зныԥшуа афотосахьақәа. Афотоцәыргақәҵа аатуеит Мушьни Лашәриа иани иаби рфотосахьақәа рыла», - ҳәа илҳәеит Ельвира Арсалиа.

Аԥснытәи агуманитартә ҭҵаарақәа Ринститут адиректор Арда Ашәба, иахьа араҟа ицәыргақәҵоу афотосахьақәа Мушьни Лашәриа иԥсҭазаара еиуеиԥшым аганқәа аадырԥшуеит ҳәа иазгәеиҭеит.

Апоет, ауаажәларратә усзуҩ Владимир Занҭариа, аԥсуа литература ахьӡ ҭызгаз,  иналукааша апоет иира Амш - аиубилеитә рыцх азгәаҭара Аԥсны азы ныҳәа дууп ҳәа иазгәеиҭеит. «Иара иахьа 85 шықәса ихыҵит, аха иара уаанӡа еиԥш иахьагьы арҿиаратә усура дазҿлымҳауп. Иара уаҳа илиршаша, иҟаиҵаша, икалам иҵыҵыр зылшо арҿиамҭақәа  дрызхәыцуеит», – ҳәа иҳәеит Владимир Занҭариа.

Иара еизаз иргәалаиршәеит, 2010 шықәсазы Кремльтәи Ахан, Ацқьа Гьаргь Аиааирагаҩы изал аҿы, жәлар ракзаара Амшныҳәа азгәаҭара аҳәаақәа ирҭагӡаны, Мушьни Лашәриа еизаз зегьы рҿаԥхьа А.Пушкин иажәеинраалоу ироман «Евгени Онегин» ацыԥҵәаха аԥсышәала дшаԥхьаз. «Аԥсуа культуреи ажәеи рӡыргара азы еиҳау аформа ҟалар ауама», – ҳәа иҳәеит Владимир Занҭариа.

Апоет ииубилеи идырныҳәалеит Аԥсны анаукақәа Ракадемиа апрезидент Зураб Џьапуа, апоетесса Гәында Сақаниа, ауаажәларратә усзуҩ Виачеслав Цыгәба, абыргцәа Рхеилак ахантәаҩы Аполлон Думаа, Ауаажәларратә Палата амаӡаныҟәгаҩ, «Аԥсны анацәа аҭынчреи  асоциалтә   иашареи рзы» Аиҿкаара ахантәаҩы Гәыли Кьычба.

Ахәҭакахьала, Мушьни Лашәриа еизаз зегьы иара иганахьала иаадырԥшыз агәцаракра азы иҭабуп ҳәа реиҳәеит.

«Арҭ афотосахьақәа Аԥсны аҭоурых, атәыла аҿы имҩаԥысуаз еиуеиԥшым ахҭысқәа  аадырԥшуеит. Араҟа иаарԥшуп хаҭала рбара сара сзы инасыԥыз еицырдыруа ауаа», – ҳәа иҳәеит Мушьни Лашәриа.