Асҭамыр Гәыниа, уахыки-ҽнаки рыла ахәышәтәырҭа иадҵаалоит 150-ҩык рҟынӡа ауаа, араҟа аус зуа аҳақьымцәа рџьабаа цәгьоуп ҳәа иазгәеиҭеит.  

Аҳақьым хада иҟаиҵаз адыррақәа рыла, ахәышәтәырҭа аҿы есышықәса апациентцәа рхыԥхьаӡара ахьазҳауа инамаданы, ашьҭаларҭа ҭыԥқәа разымхара ыҟоуп. 

Едуард Быҭәба сынтәа иаартыз «Мельцеровскии бокс» ҳәа изышьҭоу аинфекциа-диагностикатә кабинет аусура геиҭеит. Ари абокс агәабзиарахьчара Аминистрра аԥшьгаралеи атәыла анапхгара иҟанаҵаз афинанстә цхырааралеи иаартын.

Абокс аамҭак ала акы-ҩба чымазара зыхьуа, мамзаргьы зчымазара шьақәыргылам, аха акыр ишәарҭоу аинфекциа злаҽыз ачымазаҩ иҿцаауаз апациентцәа раҟәыҭхара алнаршоит. Уи азы аҭаххара есааира иазҳауеит, иара убас аҳақьымцәа ишьақәдыргыло аинфекциақәа рыспекторгьы иазҳауеит.  Убас, иаагозар, иҳаҩсыз ашықәсқәа рзы аԥхынразы иҳамоу амедицинатә персонал зегьы аиҳарак аротовирус ҳәа изышьҭоу аҿкы чымазара ахәышәтәра рҽазыркуазҭгьы, сынтәа аҭагылазаашьа акыр аҽаԥсахит ҳәа уҳәар алшоит. Ареспублика аҿы лассы-лассы ицәырҵуеит аимҳәаршә, абҷы, ацәаркыҷы, уҳәа ҷыдала ишәарҭоу аҿкы чымазарақәа цәырҵуа иалагеит. 

Асҭамыр Гәыниа абокс русураҿы даараӡа ицхыраагӡа бзианы иҟалеит ҳәа иазгәеиҭеит.  

Агәабзиарахьчара аминистр Едуард Быҭәба ишазгәеиҭаз ала, атәылаҿы уаҳа зда ыҟам аинфекциатә хәышәтырҭа азы бокск мацара даара имаҷуп.

«Ас еиԥш абоксқәа ҩба-хԥа ирыдамхаргьы рыҟазаара хымԥадатәиуп. Агәабзиарахьчара Аминистрра  атәыла анапхгара ацхыраарала даҽа бокс аргыларазы алшарақәа рыԥшаара алнаршоит», –  ҳәа иҳәеит агәабзиарахьчара аминистр.

Агәабзиарахьчара аминистр апациентцәа дрыҿцәажәеит, урҭ рҭаххрақәа дрызҵааит, иара убас аинфекциатә хәышәтәырҭа ахь иаашьҭу, аҭыԥантәи аҳақьымцәа ацхыраара рызҭо урыстәылатәи аҳақьымцәа дырԥылеит. Едуард Быҭәба урҭ иҟарҵо ацхыраареи инарыгӡо аусуреи рзы иҭабуп ҳәа реиҳәеит.