Аҟәа. Нанҳәамза 31, 2023 шықәса. Аԥсныпресс. Аҳәынҭқарра Ахада Аслан Бжьаниа Очамчыра араион Аҭара ақыҭан игылоу, ааигәа зеиҭашьақәыргылара хыркәшахаз абжьаратәи ашкол даҭааит.
Аҳәынҭқарра Ахада аклассқәа, арҵаҩцәа руада, иара убас аспорттә зал даҭааны игәеиҭеит.
Аҳәынҭқарра Ахада ашкол аиҭашьақәыргылара знапы алакыз зегьы иҭабуп ҳәа реиҳәеит.
«Ари даара узеигәырӷьашьа хҭысуп. Уи агәыҳалалра злоу ауаа имаҷымкәа ишҳамоу арҵабыргуеит. Иахьа ҳара араҟа зеиӷьаҟам ашкол ахыбра аабоит, зегьы иҳараку аҩаӡараҿы иҟаҵоуп. Зегьы ахәыҷқәа арҭ аклассқәа рҿы рҵара маншәалахарц азы иҟаҵоуп. Араҟа аҵаҩцәа рзы хра злоу аинформациа зну астендқәа рацәоуп», – ҳәа иҳәеит Аслан Бжьаниа.
Иара Жәлар Реизара-Апарламент адепутат Резо Занҭариеи Аԥсны иқәынхо аерманцәа Реилазаара алахәылацәеи уи ахантәаҩы Алик Миносиани, ақыҭауааи, иара убас ашкол аиҭашьақәыргылараҿы ацхыраара ҟазҵаз егьырҭ ауаагьы иҭабуп ҳәа реиҳәеит.
Аслан Бжьаниа шьҭарнахыс ашкол аҿы аҵара зҵо аҵаҩцәа еиҳа ишырацәахо азы агәыӷра ааирԥшит.
Аҳәынҭқарра Ахада ашкол аиҳабы Светлана Быҭәба лнапы иаиркит акомпиутертә техника аахәаразы асертификат.
Очамчыра араион ахада Беслан Бигәаа убасҵәҟьа ашкол ацхыраара азҭаз зегьы иҭабуп ҳәа реиҳәеит.
Очамчыра араион Ахадара ашкол акомпиутер ҳамҭас ианаҭеит.
Ашкол аиҭашьақәыргыларазы афинанстә цхыраара ҟазҵаз иреиуоу Жәлар Реизара-Апарламент адепутат Резо Занҭариа зегьы ирыцкыз ахәыҷқәа аҵаразы иманшәалоу аҭагылазаашьақәа аԥҵатәын ҳәа иазгәеиҭеит.
Уи иажәақәа рыла, ҳтәылаҿы ашкол ацхырааразы агәазыҳәара змоу атәылауаа маҷӡам.
«Ауаҩы изкызаара инагӡаны еиликаауеит иԥсҭазаара ауаажәларра ианырзикуа. Сара ауаажәларра рзы схәарҭаны аҟаларазы исымаз агәазыҳәара иабзоурахазар ҟалап, алшарақәа ԥшааны урҭ ашкол аргыларахь иахьдәықәызҵаз. Зегьы реиҳа уи азы агәазҭазаара сызҭаз, сыблала ахәыҷқәа рҵараиура аҭагылазаашьақәа ахьызбаз ауп. Ақыҭауаа зегьы уи даара еигәырӷьеит, аргыларатә маҭәахәқәа зқәыз амашьынақәа аидара рықәыхра аума, даҽакал аума, ирылшоз ала ицхыраауан. 20 инарзынаԥшуа ахаҳәсса зқәыз аидарамҩангагақәа аидара ақәырхит. Анапеилаԥса уаҩ дааӡоит, ҳәа баша ирҳәаӡом. Ҳамчи ҳахшыҩи еилаҵаны аус ааулар, ақәҿиарақәа ҟамлар ауӡом», – ҳәа иҳәеит адепутат.
Уи иара убас, сынтәа Аҭаратәи ашкол иреиӷьу арҵаҩы далкаан, уи аԥаратә ҳамҭа лыҭан ҳәа адырра ҟиҵеит. Уи азы адепутат иазоуижьит адепутат иаҳасабала иоуа аулафахәы.
Ашкол адиректор Светлана Быҭәба ашкол аколлектив, аҭаацәа, аҵаҩцәа рыхьӡала иҟаҵаз ацхырааразы иҭабуп ҳәа лҳәеит.
Лара ашкол ахыбра шыԥсаху, аԥенџьыр ҿыцқәа шаҿарҵаз, иара убас аҩныҵҟатәи аиҭашьақәыргыларатә усурақәа шымҩаԥго гәахәара дула иазгәалҭеит.
