Иарбоу амашәыртә хҭыс аҟалара аҭагылазаашьақәа ртәы макьаназы еилаам. Иарбоу ахҭыс азы аусеилыргара мҩаԥысуеит.
29.Нанҳәа.2023
Аҟәа ақалақь аҿы иҟалаз амашәыртә хҭыс иахҟьаны ҩыџьа ауаа ҭахеит.
Аҟәа. Нанҳәамза 29, 2023 шықәса. Аԥсныпресс. Аҟәа ақалақь Жданов имҩала игылоу ахатәы ҩны аҿы амашәыртә хҭыс ҟалеит. Заанаҵтәи адыррақәа рыла, аҭҟәацра ҟалеит, уи иахҟьаны ҩыџьа ауаа рыԥсҭазаара иалҵит, аӡәы ахәышәтәырҭахь днагоуп, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.
«Иҷыдоу аҭагылазаашьа азы адырра Аминистрра ахь иҟалеит 11 сааҭи 40 минуҭи рзы. Амашәыр ахьыҟалаз аҭыԥ ахь иаразнак амҩа иқәлеит Иҷыдоу аҭагылазаашьақәа рзы Аминистрра апиротехникатә ҟәша, амедицинатә ҟәша аусзуҩцәа, иара убас аԥсеиқәырхаҩцәеи амцарцәаҩцәеи.
Уахь днеит аԥсеқәырхаратә Хылаԥшырҭа ахадагьы Лев Кәыҵниа», - ҳәа иазгәаҭоуп ацҳамҭа аҿы.
