Аҟәа. Нанҳәамза 24, 2023 шықәса. Аԥсныпресс. Аԥсны Аҳәынҭқарра Ахада Ихаҭыԥуаҩ Бадра Гәынба араионқәеи ақалақьқәеи рхадацәа алархәны аусуратә еилатәара мҩаԥигеит. Аиԥылараҿы Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵреи Урыстәылатәи Афедерациа ала Аԥсны ахьыԥшымреи асуверенитети разхаҵара Амш 15-шықәса ахыҵреи ирызку аныҳәатә усмҩаԥгатәқәа рымҩагара аҽазыҟаҵара иадҳәалоу азҵаарақәа жәпакы ирылацәажәеит, ҳәа адырра ҟанаҵоит Аҳәынҭқарра Ахада ипресс-маҵзура.
Аԥсны ақалақьқәеи араионқәеи рхадацәа нанҳәамза 26 рзы имҩаԥгахо аныҳәатә усмҩаԥгатәқәа рыпланқәа инарҭбааны адгалара мҩаԥыргеит.
Ажәхәқәа инарықәыршәаны, араионқәа рҿы имҩаԥгахоит аныҳәатә концертқәа, ацәыргақәҵақәа, аконкурсқәа, атурнирқәа, аибашьраҿы иҭахаз аибашьцәа рбаҟақәеи рҳаҭгәынқәеи рымҵан ашәҭ шьыҵәрақәа рышьҭаҵара иадҳәалоу ацеремониақәа.
Аныҳәақәа раламҭалазы апаркқәеи абаҟақәеи рҭеиҭыԥш арҽеира иазку аусурақәа мҩаԥысуеит. Иара убас аибашьра аветеранцәа рԥыларақәа рымҩаԥгара азԥхьагәаҭоуп.
Аҳәынҭқарратә комиссиа аусура аҳәаақәа ирҭагӡаны арҽеира-еиҭашьақәыргыларатә усурақәа рымҩаԥгаразы азыҳәамҭақәа аԥхьанатә ишьақәырӷәӷәаз абиуџьет аасҭа акыр иахьеиҳахаз инамданы, атәыла аԥыза-министр Алеқсандр Анқәаб иаанхаз аобиектқәа ҳазҭоу ашықәс нҵәаанӡа, иара убас иааиуа ашықәс азы хымԥада реиҭашьақәыргылара мҩаԥгахоит ҳәа иазгәеиҭеит.
Аҳәынҭқарра Ахада Ихаҭыԥуаҩ Бадра Гәынба иажәақәа рыла, аныҳәақәа рҽазыҟаҵара аҳәаақәа ирҭагӡаны, ареспублиа аҿы амҩду хада иаваршәны арлашагақәа реиҭашьақәырыгылареи амҩатә дыргақәа рышьақәыргылареи иазкны аусурақәа мҩаԥысуеит ҳәа иазгәеиҭеит. Иара убас аиҭашьақәыргыларатә усурақәа мҩаԥысуеит аихамҩатә вокзалқәеи аплатформақәеи рҿы, ацҳақәа еиҭашьақәыргылахоит, уҳәа егьырҭ аусурақәа нагӡахоит.
Аилатәара иалахәыз иара убас 1992-1993 шш. Аԥсны жәлар Рџьынџьтәылатәи еибашьра аҿы иҭахаз рҭаацәа аматериалтә цхыраара рыҭара азҵаарақәа ирылацәажәеит.
Аилатәара ахыркәшамҭаз Аҳәынҭқарра Ахада Ихаҭыԥуаҩ Бадра Гәынба араионқәа рхадацәа иааиуа аныҳәақәа разыҟаҵара иазку аусурақәа рырӷәӷәара азы адҵа риҭеит.
