Иара убас, агәабзиарахьчара Аминистрра араионтә хәышәтәырҭа амедусзуҩцәа ирзаархәеит аԥҟагақәеи еиҭаҵуа алампеи.

Агәабзиарахьчара аминистр Едуард Быҭәба ишазгәеиҭаз ала, араионтә хәышәтәырҭақәа рҟынтәи Аминистрра ахь инеиуа азыҳәамҭақәа зегьы ирыхәаԥшны излауа ала ирласны ацхыраара ҟарҵоит. «Ҳара мызқәак раԥхьа Очамчыратәи араионтә хәышәтәырҭа Хада ҳаҭааит, ахәышәтәырҭа анапхгараҭареи аперсонали ихадоу рҭаххрақәа ирылацәажәеит.  

«Ахәшәтәырҭа аҭаххрақәа рынагӡара аплан шьақәҳаргылеит, уи шьаҿа-шьаҿала излаҳалшо ала инаҳагӡоит. Агәра ганы сыҟоуп хара имгакәа ҳмедицинатә усбарҭақәа зегьы ихадоу рҭаххрақәа рынагӡара шҳалшо ҳәа» - иҳәеит агәабзиарахьчара аминистр Едуард Быҭәба.

Агәабзиарахьчара Аминистрра иара убас Очамчыра араионтә хәышәтәырҭа ахшараиурҭатә ҟәшагьы ацхыраара ду анаҭеит. Убас, ахшараиурҭатә ҟәша аҳақьымцәа русура еиҳа изырмарио  амедицинатә инструментқәа рызҩыдага аҭоуп.  

Очамчыратәи араионтә хәышәтәырҭа ахшараиурҭатә ҟәша аҳақьымцәа русураҿы даҽа уадаҩраны иҟаз – уи мгәаҭа иҟоу ахәыҷи ҿыц ииз амаалықьи ргәеисра ҭазыҩуа аппарат КТГ ауп.  Зцәазтәымыз аҳәса ас еиԥш иҟоу амедицинатә ҭҵаара иахысырц азы егьырҭ араионқәа рахь ицар акәхон. Уажәшьҭарнахыс аҭагылазаашьа акыр аҽеиҭанакит. Мышқәак раԥхьа, иарбоу аппарати ахәышәтәырҭа аҳақьымцәа рыгәцаракреи  ирыбзоураны  диит зыкапан дуу, 4 кьылак иреиҳау аԥшқа Санель Данелиа.

Араион аҭаара аҳәаақәа ирҭагӡаны, аминистр Едуард Быҭәба араионтә хәышәтәырҭа Хада аҿы азеиԥш ҭагылазаашьа зеиԥшроу гәеиҭеит, апациентцәеи аҳақьымцәеи дрыҿцәажәеит, ахәышәтәырҭа аринахысгьы ацхыраара аҭара шалыршахо агәра диргеит.