Аҟәа. Нанҳәамза 9, 2023 шықәса. Аԥсныпресс /Алексеи Шамба/. Ацәыргақәҵатә зал Хада аҿы иаатит ҳаамҭазтәи асахьаҭыхыҩцәа рцәыргақәҵа «Аԥхынтәи агалереиа».
Аекспозициа аҿы ицәыргақәҵоуп Аԥшь Ҳагба, Диана Хьынҭәба, Витали Кацба, Виссарион Ҵәыџьба, Руслан Габлиа, Лаша Габелиа, Борис Ашәба, Лиудмила Будиак, Валериан Ҭарба, Марииа Делба, Маклина Ҵәыџьба, Беслан Арӡынба, Сабина Кәарҷелиа, Владимир Воуба, Аксана Барзаниа, уҳәа егьырҭ асахьаҭыхыҩцәа рнапы иҵыҵыз аҿыханҵа, аграфикеи аскульптуреи рыстильқәа рыла инагӡо русумҭақәа жәпакы.
«Шаҟа илашоузеи игәыҟаҵагоузеи арҭ аусумҭақәа. Урҭ акыраамҭа урыдымҵыкәа рыхәаԥшра уҭахуп. Сара хымԥада акык-ҩбак аасхәуоит. Урҭ ара Аԥсны сыҟазаара атәы сгәаладыршәалоит», - ҳәа илҳәеит Новосибирскынтәи Аԥсныҟа ԥсшьараҳәа иааз Анна.
«Сара сахьынаԥшра сыздырӡом. Конкретла еиҳа исгәаԥхо алкаара сцәыуадаҩуп. Иааизакны аекспозициа сахәаԥшуеит, уи даара ублаҿы иааиуеит, иугәамԥхар залшаӡом. Исгәаԥхоит уи ашьақәгылашьа», - ҳәа иазгәеиҭеит Аҟәа ақалақь аҿы инхо Асҭамыр.
«Аиаша уҳәозар, сара ари ацәыргақәҵа аҭаара зынӡа сгәы иҭамызт, аха ус иҟалеит. Адәахьы даараӡа ишоуроуп, араҟа аҳауаҭышәынтәалагақәа аус руеит. Азныказы, 15 минуҭк раҟара саатәаны сыԥсы ааиҭакны сцап ҳәа сгәы иҭан, аха нас избаз сагәыланахалан абар шьҭа сааҭк еиҳаны араҟа асахьақәа срыхәаԥшуеит. Жәаҳәарада акык-ҩбак аскульптурақәа аахәаны сыҩныҟа изгоит», - ҳәа илҳәеит Саранск ақалақь аҟынтәи ԥсшьараҳәа Аҟәа иааны иҟоу Ольга.
Ацәыргақәҵа аус аулоит нанҳәамза 29 аҟынӡа. Аусумҭақәа зегьы хаҭалатәи еиԥш акорпоротивтә коллециа азы аахәара ҟалоит.
