Аҟәа. Нанҳәамза 23, 2023 шықәса. Аԥсныпресс. Аԥсны ашкол иҭоу аҭыԥҳацәа ҩыџьа Ареспублика Ҭаҭарсҭан иҟоу жәларбжьаратәи аҿартә кампус иаҭааит, ҳәа адырра ҟанаҵоит Аԥсны иҟоу Урыстәыла аус ацура Ахаҭарнакра.
Ақалақь Набережные Челны иҟоу ахәыҷтәы технопарк «Кванториум» аҿы имҩаԥысуан жәларбжьаратәи акампус «Атехнологиақәа рмаршрутқәа» асмена. Уи рхы аладырхәит ҩыџьа аԥснытәи ашколхыҷқәа. Арҭ аҭыԥҳацәа уаанӡа имҩаԥгаз атуристтә маршрутқәа «Акультуратә аартрақәа» рыпроектҟаҵара азы жәларбжьаратәи ахакатон аҿы аиааира ргеит.
Аконкурс «Акультуратә аартрақәа» ареспубликатә етап аҿы аиааира згаз – Гиачрыԥшьтәи абжьаратәи ашкол аҵаҩы Диана Туркмениани Дариа Хлебниковеи «Акинотә Аԥсны, мамзаргьы акульттә кинофырхаҵақәа рышьҭала» ҳәа атуристтә маршрут аӡыргара мҩаԥыргеит. Урҭ Набережные Челны ахь акыр иззыԥшыз апутиовка роуит.
Хәымш ирылагӡаны Ҭаҭарсҭан, Египет, Монголиа, Казахсҭан, Аԥсны, Белоруссиа аҟынтәи 60-ҩык ахәыҷқәа атуристтә маршрутқәа реиқәыршәара, 3D-акьыԥхьра ахархәарала апроектқәа раԥҵара, VR-технологиақәа, акартографиа, иԥсабаратәым аинтеллект ахархәарала апанораматә ҭыхреи атехнологиақәеи уҳәа азы иҿыцӡоу атехнологиақәа ҭырҵаауан.
Акампус апрограмма аҵарадырратә усҩаԥгатәқәа рнаҩс еиуеиԥшым аекскурсиақәа рыла игәылҭәаан. Убас ахәыҷқәа Ареспублика Ҭаҭарсҭан агәы — Казантәи Кремль иаҭааит, аҭоурыхтә Елабуга рбеит, акоманда «КАМАЗ-мастер» аспорттә база иаҭааит.
«Акампус «Атехнологиақәа рмаршрутқәа» апрограмма атехнологиатәи асоциалтәи апроектқәа реицынагӡарала жәларбжьаратәи аизыҟазаашьақәа рырӷәӷәара иазырхоуп», – ҳәа иазгәарҭоит Афорум аиҿкааҩцәа.
Асмена аусмҩаԥгатә хаданы иҟалеит амаршрутқәа реиқәыршәаразы аконкурс. Уи зхы алазырхәыз Аԥснытәи алахәылацәа акомандатә еицлабраҿы аҩбатәи аҭыԥ ааныркылеит, аҳамҭа бзиақәа ранашьахеит.
«Сара даараӡа исгәаԥхеит араҟа сыҟазаара, аиҳарак ҳотриади ҳнапхгаҩцәеи. Уаанӡа сара ас еиԥш аамҭа кьаҿ иалагӡаны аизааигәахара, аҩызара абжьаҵара акыр иуадаҩуп ҳәа сгәы иаанагон. Сара даара исгәаԥхеит егьырҭ атәылақәа рҟынтәи иааз ахәыҷқәа. Дареи ҳареи ҳаибадырит. Сгәалашәараҿы акыраамҭа иаанхоит Казани Елабугеи рахь ҳцара. Ҳара аринахысгьы ҿыц ҳзабадырыз ҳҩызцәеи ҳареи аимадара ҳабжьазаауеит. Урҭ аҭак аҳасабала Аԥсныҟа раара ҳазыԥшуп», – ҳәа еиҭалҳәеит Дариа Хлебникова.
Ари аусмҩаԥгатә мҩаԥысуан Аԥсны иҟоу Урыстәыла аус ацуразы Ахаҭарнакра, Урыстәылатәи ахәыҷқәеи аҿари Реиҿкаара «Движение первых» Ҭаҭарсҭантәи аҟәша, Иаарту Акционертә Еилазаара «КАМАЗ», Автономтә Икоммерциатәым Аиҿкаара «Техногород», афорум «Акультуратә аартрақәа» аиҿкааратә комитет иҟарҵаз адгылара иабзоураны.
