Аҟәа. Нанҳәамза 23, 2023 шықәса. Аԥсныпресс. /Алеқсеи Шамба/. Ф.Искандер ихьӡ зху Аҳәынҭқарратә аурыс драматә театр адиректор Хада Иракли Хьынҭәба ахаша, нанҳәамза 23 рзы апресс- конференциа мҩаԥигеит. Араҟа уи атеатр изаамҭанытәиу аусура атәы, ҳаԥхьаҟа имҩаԥысраны иҟоу аԥхьарбарақәеи цәыббрамзазы иазԥхьагәаҭоу Григори Козлов инапхгарала аус зуа Санкт-Петербург ақалақь атеатр «Мастерская» Аԥсныҟа агастрольқәеи ртәы ажурналистцәа ирзеиҭеиҳәеит.
Иракли Хьынҭәба, Ф.Искандер ихьӡ зху Аҳәынҭқарратә аурыс драматә театр (РУСДРАМ) актавла абар шьҭа бжьышықәса ирылагӡаны аус ауеит ҳәа иазгәеиҭеит. Ари аамҭа иалагӡаны атеатр аусура аҩаӡара аларҟәра алзмыршо ашьаҭа акра алыршахеит. Уи убри аан атеатр амаҵзурақәа зегьи актиорцәа рыпрфессионализм азҳара ишаҿу азгәеиҭеит.
Уи иацхраауеит есымша аспектакльқәа рырбара ахьалыршоу.
«Фазиль Искандер итеатр – ари ихьыԥшым аҳынҭқарра аҳҭнықалақь атеатр ауп, убри аҟнытә ҳара акаҿы ҳашьҭаханы аҟалара азы азин ҳамаӡам», – ҳәа иҳәеит иара.
Ҳазҭоу ашықәс азы ахәаԥшцәа идырбан аспектакльқәа «Софичка», «Ахаҵа ԥшӡа», «Аԥра цәаԥшьқәа», «Ашәахәақәа рыҩныҵҟа», «Оз атәыла аҟынтәи ахынҳәра», «Роман с кокаином». Урҭ зегьы Аԥсны адагьы уи анҭыҵгьы, ахәҭакахьала Урыстәыла аншлаг ацны имҩаԥысуеит.
Атеатр адиректор Хада ишеиҭаиҳәаз ала, ҳазҭоу ашықәс мшаԥымзазы Москвеи Санкт-Петербурги ақалақьқәа рҿы Беслан Агрба напхгара зиҭо Москватәи аԥсуа диаспора адгыларала қәҿиарала имҩаԥысит агастрольқәа. Лаҵарамзазы атеатр аспектакль «Солярис» ала Архангельск ақалақь ахь ицеит, рашәарамзазы агастрольқәа мҩаԥысит Горно-Алтайск, Набережные Челны, иара убас Новокузнецк ақалақьқәа рҿы. Цәыббрамза 22 рзы атеатр Иркутск ақалақь ахәаԥшцәа иднарбоит аспектакль «Солярис», жьҭаарамза 1 азы Москва ақалақь аҿы имҩаԥысуеит аспектакль «Ашәахәақәа рыҩныҵҟа» арбара, абҵарамзазы аурыс драматә театр Санкт-Петербург ақалақь аҿы ихәмаруеит аспектакль «Аԥынгыларақәа зегьы ириааиуа агәырӷьара» («Радость вопреки всему»).
Иракли Хьынҭәба, агастрольқәа зегьы рфинанстәра издызкыло аган ала имҩаԥысуеит, иара убри ала Аԥсны абиуџьет аҟынтәи ахарџьтә қәыӷәӷәара ҳәа акгьы ацӡам ҳәа иазгеиҭеит. Убри аан уи аҳәынҭқарра атеатр ахыбра ҭеиҭыԥшлатәи аиҭашьақәыргылара аҿы иҟанаҵаз ацхыраара азы иҭабуп ҳәа иҳәеит.
«Аӡәгьы ирџьареи акритика изуреи аҭахӡам. Зегьы ирыцку – доусы инапы злаку аус ибзианы анагӡара ауп», – ҳәа иҳәеит иара.
Иракли Хьынҭәба иааиуа амзақәа рзы имҩаԥысраны иҟоу аспектакльқәа раԥхьарбара азы заанаҵтәи адырра ҟаиҵеит: А. Пушкин иҩымҭа ала Сергеи Ефремов иқәиргылаз аспектакль «Евгени Онегин», Т. Уилиамс иҩымҭа ала Марк Вдовин иқәиргылаз аспектакль «Стеклянный зверинец», У. Шекспир икомедиа ала Антон Корнилов иқәиргылаз аспектакль «Виндзорские насмешницы».
Иракли Хьынәба, цәыббрамзазы Григори Козлов инапхгарала аус зуа Санкт-Петербург ақалақь атеатр «Мастерская» агастроль ҳасабла Аԥсныҟа ишаауа азы адырра ҟаиҵеит. Аԥснытәи аурыс драматә театр (РУСДРАМ) асцена аҿы цәыббрамза 6 рзы ахәаԥшцәа идырбахоит У. Шекспир иаԥҵамҭа ала Григори Козлов иқәиргылаз аспектакль «Ромео и Джульетта», цәыббрамза 7 рзы - Марииа Романова иқәлыргылаз аспектакль «Жёны», цәыббрамза 8 рзы Леонид Зорин иқәиргылаз аспектакль - «Варшавская мелодия», цәыббрамза 9 – 10 рзы –Галина Бызгу иқәлыргылаз ахәыҷқәеи аҭаацәа зегьи рзы еицырдыруа аспектакльқәа ҩба - «Волшебник изумрудного города», «Винни-пух и все-все-все».
