Аҟәа. Нанҳәамза 22, 2023 шықәса. Аԥсныпресс. Харитон Агрба абокс ахәылԥаз RCC Boxing Promotions аҳәаақәа ирҭагӡаны, цәыббрамза 8 рзы Челиабинск ақалақь аҿы панаматәи абоксиор диндаҭлоит, ҳәа адырра ҟанаҵоит аҿари аспорти русқәа рзы аҳәынҭқарратә Еилакы апресс-маҵзура.
Уи дицлабуеит 31-шықәса зхыҵуа Панаматәи аспортсмен Алеқсандр Диуран. Иара зынӡа имҩаԥигахьеит 21еиндаҭлара, урҭ рахьынтә быжьҩа анокаут ала ихыркәҳахеит. Аиҳарак иара иԥсадгьыл аҿы ауп аиндаҭларақәа ахьымҩаԥигоз, аха Мексикаҟагьы дцаны аиндаҭларақәа мҩаԥигахьеит. Уаҟа Алеқсандр Диуран раԥхьаҟа даҵахеит, уи адагьы уаҳа еиндаҭларак аҿы даҵамхаӡац. Ус ишыҟоугьы, Алеқсандр Диуран маҷӡак ауп игхаз адунеизегьтәи топ-100 аҟнӡа анаӡаразы, Харитон Агрба дииааир, усҟан иара ари аелитатә сиа далалоит.
Харитон Агрба – жәларбжьаратәи акласс иаҵанакуа аспорт азҟаза, Европатәи ахәмаррақәа рҿыараӡнытә аԥхьахәгаҩ, Урыстәыла ачемпионатқәа рҿы ҩынтәны ачемпионра зҽаԥсазтәхьоу, астудентцәа рыбжьара имҩаԥгаз абокс азы адунеи ачемпионат ҩынттәи ачемпион, атитулқәа WBA Fedecaribe, WBA Continental, IBF European, Евразиатәи абоксиортә парламент атитул, иара убас «Аинтерконтиненталтә храҿа» занашьоу апрофессионалтә боксиор иоуп. 2019 шықәсазы ипрофессионалтә кариера алагара инаркны, иара имҩаԥигахьеит 12 еиндаҭлара, зегьы рҿы аиааирақәа игеит. Ааигәа имҩаԥигаз аиндаҭлара аҿы иара Џьулио Индонго диааины адунеи абсолиуттә чемпион ититул аиура иҽаԥсаитәит.
