Риҵатәи ареликтә милаҭтә парк адиректор агәра ганы дыҟоуп мчыбжьык иалагӡаны аҭагылазаашьа инагӡаны ишҭышәынтәалахо.
«Ҳара ииашоу амҩа алаҳхит ҳәа сгәы иаанагоит. Уи зегьы заҟаҳҵо аҭыԥантәи ауааԥсыреи аԥсшьаҩцәеи ршәарҭадара азы ауп», – ҳәа иҳәеит Адамыр Багаҭелиа.
Нанҳәамза 15 рзы Аԥсны атуризм аминистр Ҭеимураз Хьишба аекскурсиатә маҵзурақәа назыгӡо аиҿкаарақәеи хазхаҭалатәи аусдкылаҩцәеи Риҵаҟа ицо амҩала иҟоу Иуԥшьаратәи аҩхааҭшәа аҿы атранспорт аанкылареи атуристцәа (аекскурсиамҩаԥгаҩцәа) рҭыҵреи рақәиҭымтәра иазкны Адҵа инапы аҵаиҩит. Адҵа ҟаҵан зегьы раԥхьаӡа иргыланы, атуристцәа ршәарҭадара азы. Риҵатәи ареликтә милаҭтә парк иарбоу аҵакыраҿы лассы-лассы ахаҳәлеира ҟалоит.
Ҳазҭоу ашықәс рашәарамзазы Иуԥшьаратәи аҩхааҭшәа аҿы аҷыдалкаатә хҭыс ҟалеит. Ахаҳәлеира иахҟьаны дҭахеит 1996 шықәса рзы ииз атурист Вишниаков Владислав Сергеи-иԥа. Уи ицыз 28- шықәса зхыҵуа Пенза ақалақь инхо аԥҳәыс лшьапы ԥҵәеит, уи ахәышәтәырҭахь днаган. Даҽа амашәыртә хҭыс ҟалеит нанҳәамза 11 рзы, усҟан ибӷаз ахаҳәқәа амаршруттә такси иақәҳаит. Усҟан Анцәа иџьшьаны аӡәгьы ааха имоуӡеит.
