Инал Арӡынба иажәақәа рыла, «ҷыдала ахышыҩзышьҭара аҭахоит Аԥсни Урыстәылеи рыбжьара аизыҟазаашьақәа иҿыцу аҩаӡара ахь рцәыргара зылшо амеханизмқәа рылацәажәара».
17.Нанҳәа.2023
Аԥсны адәныҟатәи аусқәа рминистр Инал Арӡынба аитәылауаа, араионқәа рхадарақәеи реизарақәеи рхаҭарнакцәеи аҿари дырԥылараны дыҟоуп.
Аҟәа. Нанҳәамза 17, 2023 шықәса. Аԥсныпресс. Нанҳәамза 26 рзы Урыстәылатәи Афедерациа ала Аԥсны ахьыԥшымреи аҳәынҭқарратә суверенитети разхаҵара ҟалеижьҭеит 15 шықәса ҵуеит.
Иааиуа аиубилеи инамаданы атәыла адәныҟатәи аусқәа рминистр Инал Арӡынба адәныҟаполитикатә Хылаԥшырҭа аусзуҩцәа ицны араионқәа рҿы аитәылауаа, араионқәа рхадарақәеи реизарақәеи рхаҭарнакцәеи аҿари дырԥылараны дыҟоуп.
«Ари аусмҩаԥгатә ахықәкы хаданы иҟоуп – ҳтәылауаа Аԥсны адәныҟатәи аусқәа Рминистрра изамҭанытәиу аусура азы адыррақәа рыҭара, ҳаамҭазы ҳтәыла акәша-мыкәша ишьақәгыланы иҟоу жәларбжьаратәи аҭагылазаашьа, аԥсны-урыстәылатәи аизыҟазаашьақәа ирыдҳәалоу актуалра злоу аспектқәа, Кавказ Аладатәи арегион аҿы аҵыхәтәантәи аамҭазы ирласны зҽеиҭазкуа ашәарҭадара архитектура, иара убас ессааира изызҳауа Қырҭтәыла агеополитикатәии аекономикатәии амбициақәа рылацәажәара», – ҳәа иазгәаҭоуп Аԥсны адәныҟатәи аусқәа рминистр иҟаиҵаз аҳәамҭа аҿы.
