Аҟәа. Нанҳәамза 10, 2023 шықәса. Аԥсныпресс. Аимадареи, амассатә коммуникациақәеи, ацифратә ҿиареи рзы аҳәынҭқарратә Еилакы аиуристтә хаҿқәеи хазхаҭалатәи ахаҿқәеи аелектронтә напынҵамҭақәа рынаҭо иалагеит, ҳәа аанацҳауеит Аилак асаит.
«Аелектронтә напынҵамҭа азы» азакәан 2015 шықәсазы ирыдкылан, аха анагӡара алшо иҟалеит сынтәа, жәабранмзазы Апарламент аҿы азакәан ахь аиҭакрақәеи ацҵақәеи анрыдыркылаз ашьҭахь.
«Аелектронтә напынҵамҭа азы» азакәан атәылауаҩра-зинтә еилаӡарақәа рымҩаԥгараан, аҳәынҭқарратә маҵзурақәеи аҳәынҭқарратә функциақәеи, аҳасабырбатә ҳасабырбара уахь иналаҵаны егьырҭ аиуристтә ҵакы змоу ауснагӡатәқәеи рынагӡараан аелектронтә напынҵамҭа ахархәара аганахьала аизыҟазаашьақәа ҳәаақәнаҵоит.
Аимадареи, амассатә коммуникациақәеи, ацифратә ҿиареи рзы аҳәынҭқарратә Еилакы аинформациатә технологиақәа русхкы аҿы анорма-зинтә еиҿкаареи аҳәынҭқарратә политика ашьақәгылареи амҩаԥгареи рзы афункциақәа рынагӡареи аелектронтә напынҵамҭа ахархәареи рганахьала аҷыдалкаатә закәанмчы змоу аҳәынҭқарратә усбарҭаны иҟоуп. Уажәы Аимадареи, амассатә коммуникациақәеи, ацифратә ҿиареи рзы аҳәынҭқарратә Еилакы аҳәынҭқарратә усбарҭақәа реиԥш аҭыԥантәи ахаланаԥхгаратә усбарҭақәа, абиуџьеттә усхкы аҿы аус зуа аиҿкаарақәеи аусбарҭақәеи реиԥш, иалкаам ауаа – аиуристтә хаҿқәеи хазхаҭалатәи ахаҿқәеи хазхаҭалатәи аусдкылаҩцәеи аелектронтә напынҵа рыҭара шьақәзырӷәӷәо ацентр афункциақәа нанагӡоит.
Аҳәынҭқарратә усбарҭақәеи аҭыԥантәи ахаланаԥхгаратә усбарҭақәеи абиуџьеттә усхкы аҿы аус зуа аиҿкаарақәеи аусбарҭақәеи рзы аелектронтә напынҵамҭа аҟаҵареи аҭареи рзы амаҵзурақәа хәыда-ԥсада имҩаԥысуеит, егьырҭ акатегориақәа ирыҵанакуа аиуристтә хаҿқәеи атәылауааи рзы ишьақәырӷәӷәоу атариф инақәыршәаны зыхә шәатәу маҵзурахоит.
Ашьақәырӷәӷәаратә центр аҟынтәи амаҵзурақәа раиура аԥҟарақәеи урҭ ртарифқәеи рзы аинформациа зегьы аимадареи, амассатә коммуникациақәеи, ацифратә ҿиареи рзы аҳәынҭқарратә Еилакы аофициалтә саит уи иазку аҟәша аҿы иарбахоит. < https://gks.apsny.land/novosti/zayav1 > Аелектронтә напынҵамҭа Аԥсны азакәанԥҵара инақәыршәаны, ақьаад ала иарбоу адокумент иаваҟәалоит, ахархәара алшоит аилаӡарақәеи аҳәынҭқарратә маҵзурақәеи рымҩаԥгараан, аҳасабеилыргаратә ҳасабырба аҭараан.
Аелектронтә напынҵамҭа ахархәара аԥыжәара абжьааԥнытәи аԥсҭазаараҿы, аусураҿы, аҳәынҭқарратә маҵзура, аусдкылара-абизнес амҩаԥгараан уи ахархәараан иубоит. «Аҳасабырбатә ҳасабырбара азы» азакәан иалагалоу аиҭакрақәа ирыбзоураны, аиҿкаарақәа аҳасабырбатә ҳасабырбара аҳәынҭқарратә статистика атерриториалтә ҟәша, мамзаргьы Аԥсны аҳәынҭқарратә статистика аҳәынҭқарратә напхгараҭара аусбарҭа хада ахь аелекторнтә еимадара аканалқәа рыла, аелектронтә напынҵамҭа ахархәаралагьы уахь иналаҵаны, анагара рылшоит.
Аԥсны Атәылауаҩратә Закәанеидкыла актәи ахәҭа аиҭакрақәа ралагалара (ахәҭаҷқәа 1411,160, 423) иабзоураны аелектронтә напынҵамҭа зехьынџьара ахархәара алыршахеит. Шьҭарнахыс аелектронтә напынҵамҭа ала аиқәшаҳаҭра абжьаҵара, аӡбарҭақәа рахь азыҳәарақәа рынашьҭра, аҳасабырбақәа рышьақәырӷәӷәара, абалансқәа ахылаԥшратә усбарҭақәа зегьы рахь ишьақәырӷәӷәаны анашьҭра алшоит. Аелектронтә напынҵамҭа ахархәара аиур алшоит иҿыцу аусуратә еиқәшаҳаҭрақәа, аконтрактқәа рнапаҵыҩра азы, иара убри ала аусуратә транзакциақәа рырццакра алыршахоит. Абизнес азы (афирмақәа, хазхаҭалатәи аусдкылаҩцәа) — ари аиҿкаарақәа рыбжьара еиԥш аҳәынҭқарратә усбарҭақәеи рыбжьара аусеицура абжьаҵара азы зегьы раасҭа иманшәалоу инструментны иҟоуп. Уи минуҭқәак ирылагӡаны аелектронтә напынҵамҭа ала ишьақәырӷәӷәоу аелектронтә усшәҟәқәа азышьҭҩы иҟынӡа анашьҭреи урҭ аиуристтә ҵакы аҭареи, даҽакала иуҳәозар -арҵабыргреи алнаршоит.
Аимадареи, амассатә коммуникациақәеи, ацифратә ҿиареи рзы аҳәынҭқарратә Еилакы аелектронтә напынҵамҭа егьырҭ атәылақәа рҿы ахархәара аиурц азы аиқәшаҳаҭрақәа аус рыднаулоит.
