Аҟәа. Нанҳәамза 3, 2023 шықәса. Аԥсныпресс. А. Палыга иҩымҭа ала Антон Корнилов иқәиргылаз, Ф.А. Искандер ихьӡ зху Аурыс драматә театр инанагӡо аспектакль «В лучах» ала иаатуеит XV Жәларбжьаратәи амоноспектакльқәа рфестиваль SOLO. Афестиваль Москва ақалақь, Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном» аҿы жьҭаарамза, 2023 шықәсазы имҩаԥысуеит. Абри азы адырра ҟаҵоуп Ф.А. Искандер ихьӡ зху Аурыс драматә театр асаит аҟны.
XX ашәышықәсазы инхоз аԥҳәыс-аҵарауаҩ дуӡӡа Марииа Киури лыԥсҭазаареи ллахьынҵеи ирызку аспектакль «В лучах» Москва ақалақь, Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном» асцена ду аҿы ахәаԥшцәа ирызнагахоит.
Марииа Киури лроль назыгӡо Ирина Делба лажәақәа рыла, «Москва, даара зыхьӡ нагоу афестиваль аҿы амоноспектакль ахәмарра –лара лыԥсҭазаара зегьы иалганы иаалгоз гәазыҳәараны иҟоуп».
Атеатр адиректор хада Иракли Хьынҭәба, Аурыс драматә таатр шықәсык ала еиуеиԥшым жәларбжьаратәи афестивальқәа рахь ҩажәа рҟынӡа ааԥхьарақәа аиуоит, уи Аԥсны атеатралтә ҟазара Урыстәылатәи Афедерациаҿы ахәшьара ҳарак шарҭо арҵабыргуеит ҳәа инаҵшьны иазгәеиҭеит.
Фазиль Искандер ихьӡ зху атеатр афестиваль SOLO алахәхара иадҳәалоу ахарџьқәа зегьы адкылара мҩаԥызго аган ахахьы иагоит.
Жәларбжьаратәи амоноспектакльқәа рфестиваль SOLO 2008 шықәса инаркны есышықәса Москва ақалақь, Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном» аҿы имҩаԥысуеит.
Ари аамҭа иалагӡаны афестиваль москватәи апублика ирнардырит Константин Раикин, Полина Агуреева, Алексеи Девотченко, Роза Хаируллина, Роберт Уилсон, Ромео Кастеллуччи, Даниеле Финци Паска, Иан Фабр, Теодорос Терзопулос, Важди Муавад, Сониа Бергамаско, Фабрицио Џьифуни, Софиа Хилл, Дени Лаван, Пиппо Дельбоно, Анхелика Лидделл, Данио Манфредини, уҳәа реиԥш иҟоу амоножанр авиртуозқәа аӡәырҩы.
Жьҭаарамза, 2023 шықәса жәамш ирылагӡаны Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном» аҿы, иара убас Урыстәылатәи Афедерациа Атеатралтә усзуҩцәа Реидгыла Боиартәи апалатақәа рҿы имҩаԥысуеит аформа ду змоу аспектакльқәа жәабеи акамертә спектакльқәа быжьбеи. Афестиваль агеографиа шьақәгылоуп 12 қалақь рыла: Аҟәа (Аԥсны), Ванаӡор (Ермантәыла), Владимир, Вологда, Иошкар-Олу, Калуга, Киров, Москва, Псков, Толиатти, Тиумень Челиабинск (Урыстәылатәи Афедерациа).
Жәларбжьаратәи афестиваль SOLO ахықәкы хада — ажанр адиапазони актиор илшарақәеи аспектакль аҿы дырбара. Сынтәа афиша аҿы иарбоуп автофикшн-проектқәа, аҵарауаа ирызкны адокументалтә спектакльқәа, ҳаамҭазтәи апиесақәеи апрозеи, иузԥымбаауа аклассика аинтерпретациақәа: Шекспир иҟынтәи Ерофеев иҟынӡа.
