«Ҳара акурорттә сезон аилашымҭа ҳҭагылоуп, атәыла азеиԥшкрыфарҭақәа ирҭаауа асасцәеи ауааԥсыреи рсанитартә шәарҭадара хымԥада иалыршазароуп».

Алла Белиаева аминистр амшынӡы ахаҭабзиара азы адырра илҭеит. Уи лажәақәа рыла, атәыла араионқәа зегьы рҿы арбагақәа анормақәа ирықәшәо иаауеит.  

«Афон Ҿыц аҟынтәи амшынӡы агәаҭарақәа атехникатә мзысқәа ирыхҟьаны имҩаԥаҳамгеижьҭеи мышқәак ҵуеит. Агәаҭарақәа рылҵшәақәа уаҵәы иҟалароуп», -ҳәа илҳәеит лара.

Асанитар-епидемиологиатә Станциа аҳақьым хада иара убас аҿкы чымазарақәа рзы адырра ҟалҵеит. Аҿытә вирустә чымазара (ротавирус) алаҽра азы арбагақәа ишаҳдырбо ала, иарбоу аҿкы чымазара аарԥшра есышықәсатәи астатистикатә дыррақәа иреиҳаны иҟам. Акоронавирустә ҿкы чымазара акәзар,  аҵыхәтәантәи амыз азы ирацәаны аларҵәара азы афактқәа аарԥшӡамызт,  Гәдоуҭатәи араионтә хәышәтәырҭа Хада аҿы ус еиԥш ачымазара змоу апациентцәа астационартә хәышәтәра иахысӡом.

Аиԥылара ахыркәшамҭаз Едуард Быҭәба ареспублика араионқәа зегьы, аиҳарак акурорттә қалақьқәа рҿы аус зуа азеиԥшкрыфаҭақәа рсанитартә гәаҭара арӷәӷәара азы адҵа ҟаиҵеит.