Аҟәа. Нанҳәамза 3, 2023 шықәса. Аԥсныпресс. 2023 шықәса, ажьырныҳәамза инаркны рашәарамзанӡа Урыстәылантәи 11,6 млн. инарзынаԥшуа еиуеиԥшым ахықәкқәа рыла аҳәаарныцәҟа аныҟәарақәа мҩаԥган, уи  иҳаҩсыз ашықәс азы аиԥш-зеиԥшу аамҭахәҭазы имҩаԥгаз аныҟәарақәа рхыԥхьаӡара аасҭа 30%  рыла еиҳауп, ҳәа Урыстәылатәи Афедерациа Афедералтә шәарҭадара Амаҵзура Аҳәаахьчаратә Усбарҭа ахь азхьарԥш ҟаҵо, адырра ҟанаҵоит Интерфакс.

Аныҟәарақәа рхыԥхьаӡарала актәи аҭыԥ аҿы игылоуп – Ҭырқәтәыла, уахь ҳазҭоу ашықәс актәи азыбжазы идәықәлеит 2,3 млн. ҩык Урыстәыла атәылауаа. Уи шықәсык аԥхьа, аиԥш-зеиԥшу аамҭахәҭа азы иҟаз ахыԥхьаӡара аасҭа  65%  рыла еиҳауп.

Аҩбатәи аҭыԥ ааннакылоит Аԥсны – 2,1 млн. рҟынӡа аҭаарақәа, уи  шықәсык аԥхьа, аиԥш-зеиԥшу аамҭахәҭа азы иҟаз ахыԥхьаӡара аасҭа  8% рыла еиҳауп.

Ахԥатәи аҭыԥ аҿы игылоуп – Ҟазахсҭан –  1,35 млн. рҟынӡа аҭаарақәа, уи  шықәсык аԥхьа (2022шықәса), аиԥш-зеиԥшу аамҭахәҭа азы иҟаз ахыԥхьаӡара аасҭа  76% рыла еиҳауп.