Аҟәа. Ԥхынгәымза 31, 2023 шықәса. Аԥсныпресс. Аԥснытәи аҳәынҭқарратә Университет «Атуризм» азанааҭҵара аҩбатәии ахԥатәии акурсқәа рыстудентцәа акурорт «Адәы Ҟаԥшь» аҿы аԥышәарҳара иахысуеит, ҳәа адырра ҟанаҵоит ААУ аинформациеи амедиакоммуникациақәеи рыҟәша.
Аԥышәарҳаразы ицаз астудентцәа еиуеиԥшым асасааирҭатә обиектқәа рахь еихшахеит, премиум - класс ҳәа изышьҭоу, хә-иаҵәак змоу асасааирҭақәа «Marriott», «Mövenpick», «Novote», ԥшь-иаҵәак змоу аотельқәа «Ibis Styles», «Courtyard» уахь иналаҵаны.
Астудентцәа администратор, аҭелтә оператор, ашәхьчаҩ, уҳәа амаҵураҭыԥқәа рҿы аамҭала аус руеит. Уи иабзоураны дара асасцәа рыдкылареи рнырхареи рганахьала раԥхьаҟа ирыхәаша адыррақәеи аԥышәеи роуеит.
Аԥышәарҳара аекономикатә наукақәа ркандидат, агеографиа акафедра адоцент Кристина Лакербаиеи агеографиа акафедра арҵаҩы Алина Зарандиеи рнапхгарала имҩаԥысуеит.
