Ахәылбыҽха Амҳаџьыраа Рыԥшаҳәа аҿы имҩаԥгахеит Аԥсны аҭоурыхтә бираҟқәа кны ҽыла аиасра. Аҽыуаҩцәа С.Ҷанба ихьӡ зху Аԥснытәи адраматә театр аҿаԥхьа иҟоу аплошьад аҟынтәи Сергеи Багаԥшь ихьӡ зху Аплошьад аҟынӡа ҽыла ииасит.
Иара убрааҵәҟьа аҳәынҭқарратә рҿиаратә коллективқәеи аԥсуа естрада артистцәеи злаху аныҳәатә концерт мҩаԥгахеит.
Аконцерт алагаанӡа асценахь ицәыргахеит 16 бираҟ, аконцерт амҩаԥгаҩ Алхас Манаргиа урҭ рҭоурых ааркьаҿны еизаз ирзеиҭеиҳәеит.
Аконцерт иаҭааит Аҳәынҭқарра Ахада Аслан Бжьаниеи Аҳәынҭқарра Ахада ихаҭыԥуаҩ Бадра Гәынбеи.
Аԥсны Аҳәынҭқарратә бираҟи агерби шьақәырӷәӷәан ԥхынгәымза 23, 1992 шықәсазы Аҟәа ақалақь, Ареспублика Аԥсны Иреиҳаӡоу Асовет асессиа аилатәара аҿы.
Рашәарамза 3, 2005 шықәсазы Аԥсны Аҳәынҭқарра Ахада Сергеи Багаԥшь «Аԥсны Аҳәынҭқарра аҿы аныҳәатәи агәалашәаратәи амшқәа рзы» Ареспублика Аԥсны Азакәан аиҭакрақәеи ацҵақәеи ралагалара азы» Аԥсны Жәлар Реизара-Апарламент иаднакылаз азакәан инапы аҵаиҩит. Убри амш инаркны, ԥхынгәымза 23 Аԥсны Аҳәынҭқарратә бираҟ Амш ҳәа ишьақәырӷәӷәахеит.
