Урыстәыла иҟоу Аԥсны Ацҳаражәҳәарҭа апресс-маҵзура иҟанаҵо адыррақәа рыла, Алхас Кәыҵниа Игорь Ахба ари иҳараку аҳәынҭқарратә ҳамҭа аиура идиныҳәалеит, иара убас аԥсны-урыстәылатәи адипломатиатә еизыҟазаашьақәа рыҿиареи рырӷәӷәареи аус аҿы илагала дууи шықәсырацәа инеиԥынкыланы Урыстәылатәи Афедерациаҿы иҟоу Аԥсны Ацҳаражәҳәарҭа ахада имаҵураҭыԥ аҿы алҵшәа бзиала иусуреи рзы иҭабуп ҳәа еиҳәеит.

Игорь Ахба Аԥсны Анапхгара иусура ахәшьара ҳарак ахьарҭаз азы иҭабуп иҳәеит, иара убас Ацҳаражәҳәарҭа аколлектив зегьы ари аҭакԥхықәра зцу аусураҿы рлагала инаҵшьны иазгәеиҭеит.

Игорь Ахба Урыстәыла иҟоу ацҳаражәҳәаҩ Алхас Кәыҵниеи Ацҳаражәҳәарҭа адипломатцәа зегьи рнапы зларкуа аусқәа зегьы рҿы аихьӡарақәеи аманшәалареи рзеиӷьаишьеит.