Аҟәа. Ԥхынгәымза 14, 2023 шықәса. Аԥсныпресс. Гәылрыԥшь араион аҿы афымцамч азы ашәатәқәа руал 70 млн. 132 нызықь мааҭ рҟынӡа инаӡоит, ҳәа анҭыҵтәи аилатәара аҿы Аҳәынҭқарра Ахада Аслан Бжьаниа адырра ииҭеит Гәылрыԥшь араион Афымцастанциа аиҳабы Зураб Ханагәуа.
Зураб Ханагәуа ахархәара зауз афымцамч азы ашәатәқәа реизгара 23,2% рҟынӡа инаӡоит ҳәа иазгәеиҭеит.
«Ҳазҭоу ашықәс фымз ирылагӡаны Гәылрыԥшь араион аҿы ахархәара зауз афымцамч азы иахыԥхьаӡалоу ашәатәы 91 млн. 292 нызықь мааҭ рҟынӡа инаӡоит, урҭ рахьынтә ишәоуп – 21 млн. 159 нызықь», - ҳәа инаҵшьны иазгәеиҭеит Зураб Ханагәуа.
Уи иажәақәа рыла, иҳаҩсыз ашықәс аиԥш-зеиԥшыз ашықәс азы аизгара апроцент 29,3% рҟынӡа инаӡон.
«Фымз рыла ахархәара зауз афымцамч азы аиуристтә хаҿқәа рыла иҟаҵоу ашәатәқәа 71.6% рҟынӡа инаӡоит. Иахыԥхьаӡалоуп 13 млн. 946 нызықь мааҭ, ишәоуп – 9 млн. 979 нызықь мааҭ, ауал - 3 млн. 967 нызықь мааҭ. Фымз рыла ахархәара зауз афымцамч азы хазхаҭалатәи ахаҿқәа рыла иҟаҵоу ашәатәқәа - 14,5 % рҟынӡа инаӡоит. Иахыԥхьаӡалоуп - 77 млн. 345 нызықь мааҭ, ишәоуп - 11 млн. 180 нызықь мааҭ, ауал – 66 млн. 165 нызықь мааҭ », - ҳәа адырра ҟаиҵеит Зураб Ханагәуа.
Уи иҟаиҵаз адыррақәа рыла, араион аенергосистема ахархәаратә ҭагылазаашьа арманшәалареи акурорттә сезони аӡынтәи аамҭахәҭеи разыҟаҵара азы ҳазҭоу ашықәс актәи азыбжа иалагӡаны имҩаԥган 50 километр рҟынӡа инаӡо афымцамҩангагатә цәаҳәақәа реиқыршәара, 35 цыра аҿыхгақәа ԥсахын, звольҳараку акабельқәа еиҭашьақәыргылан.
«143 инарзынаԥшуа амҿтәы шьаҟақәа аихабетонтә ала иԥсахуп. Араион ауааԥсыра фымцалашарала реиқәыршәара ахаҭабзиара аиӷьтәра азы инацҵаны ишьақәыргылан 14 трансформатор, иԥсаххеит 15 иблыз атрансформаторқәа, 35 км. рҟынӡа инаӡо афамцамҩангагақәа рыԥсахит, уҳәа аусурақәа мҩаԥган», - ҳәа иҳәеит Зураб Ханагәуа.
Уи иажәақәа рыла, иарбоу аусурақәа ирыцҵахоит.
Убри аан Зураб Ханагәуа инаҵшьны иазгәеиҭеит Гәылрыԥшь араион аҿы «Амшынеиқафымцамч» аҿга ашьҭаҵарҭа аҿы аԥсахга хәҭақәа, аҿыхгақәа, аихабетонтә шьаҟақәа рзы арезерв шыҟам. Аусбарҭа аҿга ахаҭарнакцәа даҽа 800 аҟынӡа аихамҩабетонтә шьаҟақәеи егьырҭ аԥсахга хәҭақәеи афымцанхамҩа атехникатә еиқәыршәара ахархәагақәеи рзоужьра азы Ареспубликатә Унитартә Наплакы «Амшынеиқәафымцамч» ахь азыҳәамҭа ҟарҵеит.
Атәыла аԥыза-министр Алеқсандр Анқәаб араион ауааԥсыра афымцамч азы ашәатәқәа рыҟаҵара изаҟәыҵи ҳәа азҵаара ҟаиҵеит.
«Уаанӡа иҟаҵоу ашәатәқәа рзеиԥш еицҵалыҵ 40 млн. мааҭ рыла еиҳан. Афымцамч азы иҟаҵоу ашәатәқәа рыҩаӡара 14% аҟынӡа мацара анаӡара, ари даара илаҟу ҩаӡароуп», - ҳәа иҳәеит Алеқсандр Анқәаб.
Аҳәынҭқарра Ахада Аслан Бжьаниа зегьы реиҳа идуу уадаҩраны иахьа иҟоу аенергетика ауп, убри аан ауаа рхы иадырхәо афымцамч ахәԥса ашәара иаҟәыҵыр, усҟан иҟоу аҭагылазаашьа еиҳагьы иуадаҩхоит ҳәа иазгәеиҭеит.
«Ашәатәқәа ршәара иадҳәаланы ишьқәгылаз хымԥада ирҽеитәуп. Ари аҩыза апроблема Гәылрыԥшь араион аҿы мацара акәӡам иахьыҟоу, уи ареспублика зегьы аҿы иҟоуп», - ҳәәа иазгәеиҭеит Аҳәынҭқарра Ахада Аслан Бжьаниа.
