Резо Гәылариа ишазгәеиҭаз ала, атуристцәа рганахьала ацәгьоурақәеи азинеилагарақәеи рыԥхьырҟәҟәаара иазкны еиуеиԥшым аусмҩаԥгатәқәа мҩаԥысуеит.

3 130 амҩатә ԥҟарақәа реилагарақәа, ижәны амашьына аԥсҟы акра иадҳәалоу 301 зинеилагара уахь иналаҵаны, 196 – амашьына мыцхәы арццакра, 360 – амашьына авасра аԥҟара аилагареи амҩатә дыргақәа реилагареи, 113 – амашьына аԥсҟы акра азы азин зырҵабыргуа аршаҳаҭгага ада амашьына арныҟәцара, уҳәа азинеилагарақәа аарԥшуп.

«Ашықәс актәи азыбжазы илҩааз ахараԥсақәа рзеиԥш еицҵалыҵ 2 млн 332 нызықь рҟынӡа инаӡоит.  146-ҩык ижәны амашьына аԥсҟы ахьыркыз азы амашьына арныҟәцаразы азин аршаҳаҭга рымхуп», - ҳәа инациҵеит Резо Гәылариа.

Араион аҩныҵҟатәи аусқәа рыҟәша аиҳабы иҟаиҵаз адыррақәа рыла, ҳазҭоу ашықәс фымз ирылагӡаны иҟалеит амҩатә машәыртә хҭысқәа жәба, убри аан хәҩык ҭахеит, 17 – ҩык еиуеиԥшым ахәрақәа роуит.