Аҟәа. Рашәарамза 27, 2023 шықәса. Аԥсныпресс. Згәаҭара мҩаԥгаз амшынӡы ахкқәа рҿы ачымазара зырҿио абактериақәеи авирусқәеи аарԥшӡамызт. Абри азы Аԥсныпресс ахь адырра ҟалҵеит атәыла асанитартә ҳақьым хада Алла Белиаева.
«Згәаҭара мҩаԥгаз амшынӡы ахкқәа рҿы ауаҩы иҿы адизентериа, сальмонеллиоз, аротавирустәи астровирустәи инфекциа, уҳәа аҿкы чымазарақәа зырҿио амикробқәеи авирусқәеи аарԥшӡамызт», – ҳәа илҳәеит Алла Белиаева.
Аӡрыжәтәи амшынӡи асанитартә-рбаратә флора акәзар, уи анализқәа рылҵшәақәа макьаназы инагӡаны иаҳмоуӡацт, урҭ хымш рыла иҟалоит.
«Иҟоуп асанитар-рбаратә флора ҳәа изышьҭоу аилкаара, даҽакала иуҳәозар, дара рымацара ачымазарақәа рырҿиара злымшо амикробқәа, аха аорганиакатә хәашьра шыҟоу аазырԥшуа акакәны иҟоуп. Ари анализ хымш рышьҭахь иҟалоит. Иарбоу анализ есымша имҩаԥысуеит, аха сынтәатәи аԥхынразы ҳара уи анаҩс ачымазара зырҿио амикробқәа рзы ахқәа агәаҭаразы иаҳгоит», – ҳәа иазгәалҭеит Алла Белиаева.
Атәыла асанитартә ҳақьым хада лажәақәа рыла, аӡымҩангагақәа рыла иаауа аӡрыжәтә ажәра ҟалоит, аха аҩнқәа рахь инагоу аӡымҩангагақәа ртехникатә ҭагылазашьа зехьынџьара иахьеиԥшым инамаданы, еиӷьуп уи ршызар. Аӡымҩангага шәырақәа џьара-џьара иԥҽызар ауеит, аӡы арцәара аан аӡы ҟьашь иара аӡымҩангагатә шәыра ахь иҭанагалоит.
«Ҩныцыԥхьаӡа, уадацыԥхьаӡа агәаҭара амҩаԥгара залыршахом. Лассы-лассы аӡымҩангагатә шәырақәа еиуеиԥшым амзысқәа ирыхҟьаны ааха роуеит, уи азы адырра ҟанаҵоит Аунитартә Наплакы «Аӡыканал», аиҭашьақәыргыларатә усурақәа мҩаԥгахоит. Аиҭашьақәыргыларатә усурақәа рхыркәшара ашьҭахьгьы ԥыҭраамҭак ашәырақәа рыла иаауа аӡы хәашьызар, мамзаргьы ажәразы ишахәҭоу ала ицқьамзар алшоит. Ажәразы аӡы ршызар еиҳа еиӷьуп. Уи сара исҳәоижьҭеи абар шьҭа 20 шықәса ҵуеит», – ҳәа илҳәеит Алла Белиаева.
