«Ас еиԥш аҩаӡара змоу аицлабрақәа рҿы хыхь зыӡбахә ҳәоу аспортсмен ҿарацәа раԥхьаӡа акәны рхы аладырхәуан. Леон Ҳаџьымба афинал аҟынӡа днаӡеит, аха иџьбарацәоу аконтакт азы анаҩстәи аицлабрақәа дрылган, Бадри Бебиа афинал аԥшьбарк аҟынӡа днаӡеит», - ҳәа иҳәеит Аԥсны карате-до Шотокан Казе Ха Афедерациа апрезидент ихаҭыԥуаҩ, Аԥсны Аҳәынҭқарра Зҽаԥсазтәыз азыҟаҵаҩ Ахра Абыхәба.
Уи Аԥсны аҿари аспорти русқәа рзы Аҳәынҭқарратә Еилаки Аҟәа ақалақь Ахадара аҿари аспорти русқәа рзы Аусбарҭеи аԥснытәи акоманда ас еиԥш зыҩаӡара ҳараку аицлабрақәа рылахәхара ахьалдыршаз азы иҭабуп ҳәа иҳәеит.
«Заҟа лассы-ласы ҳақәгылало аҟара, убри аҟара ҳаихьӡарақәагьы еизҳалоит. Ари – аԥышәа арҳара анаҩс ҳтәыла аӡыргара иазкуп», – ҳәа иазгәеиҭеит Ахра Абыхәба.
Аицлабрақәа рҿы аԥхьахәқәеи аиааирақәеи згаз зегьы Европа еизгоу акоманда аилазаара иалалоит. Урҭ Евразиа Ахраҿа агаразы аицлабра (нанҳәамза 4-6 рзы, Аԥсны, ақ. Аҟәа), иара убас Адунеи Ахраҿа агара (нанҳәамза 26-27, 2023 шықәса рзы, Индиа, Ченнаи ақалақь аҿы) рхы аладырхәуеит.
