«Ҳара ҳзы акырӡа аҵанакуеит аужьҭымҭацәа зегьы еиҟараны рхы рбо аҟаҵара. Зегьы иахьа ирылшаӡом зыхә дуу ашәҵатәы аахәара, убри аҟнытә ҳара зегьы еиԥшны еилаҳәазаауеит ҳәа аӡбамҭа ҳадаҳкылеит», –  ҳәа иазгәалҭеит лара.

Даҽа асимволтә ҵакы зҵоу аҷыдара – доусы рышәҵатәы иану аԥхьаӡац «30». Уи Аԥсны жәлар Рџьынџьтәылатәи еибашьра аҿы Аиааира агара Амш  30 - шықәса ахыҵреи ареспублика аҿы аибашьрашьҭахьтәи 30-тәи ашколтә аужьҭымҭацәеи рсимволра ауеит.  

«Апсни асимволра зыхә дуу аҵкқәа рҿы азгәаҭара ҳара иҳалымшеит. Сара сгәаанагарала зегьы рзы еиԥшу ашәҵатәы иадҳәалоу аексперимент анагӡара ҳалшеит», –  ҳәа дԥышәырччо илҳәеит  Марина Аршба.

Аҟәа ақалақь ахада ихаҭыԥуаҩ Асҭамыр Ашәба ашкол аужьҭымҭацәа дрыдныҳәалеит.  

«Ҳара зегьы ианҳаамҭаз ари игәыхыҭхыгоу, даара ишьаху амҩа ҳынысит. Аҵара ашықәсқәа раан доусы аихьӡарақәеи реиԥш ақәымҿиарақәеи  иман. Гәык-ԥсыкала ишәзеиӷьасшьоит ақәҿиара дуқәеи шәаԥхьаҟа иалышәхуа азанааҭ аҿы аманәалареи», – ҳәа иҳәеит иара.

Ҷыдала зеихьӡарақәа рыла зҽалызкааз аҟәатәи ашколқәа роужьҭымҭацәа аҳаҭыртә шәҟәқәа ранашьахеит.

Аиҿкааратә хәҭа анаҩс зегьы ргәы хыҭхыҭуа иззыԥшыз аныҳәатә концерт алагеит.