Аҟәа. Рашәарамза 23, 2023 шықәса. Аԥсныпресс. Аҩныҵҟатәи аусқәа рминистр Роберт Киут Ирласны анырра аҟаҵаразы иҷыдоу аотриад даҭааит. Ацәаҳәақәгылара ашьҭахь аминистр Ирласны анырра аҟаҵаразы иҷыдоу аотриад аҿы имҩаԥгаз аусура азы адырра ирҭеит.
Аотриад акомандаҟаҵаҩ, аподполковник Дадын Чачхалиа, абаза иахьаҵанакуа аԥыԥшырҭа ахәҭа ахыбра ҿыц ргылан ҳәа адырра ҟаиҵеит. Уи иахәҭоу атехникала еиқәыршәоуп, уахи-ҽни авидеохылаԥшра мҩаԥысуеит.
Роберт Киут абџьаршьҭаҵарҭа, аплошьадкеи аотриад ртәарҭеи гәеиҭеит, иҷыдоу атехникеи абџьари рыхкқәа гәеиҭеит. Атеориатә дҵақәеи аруаа рҵаратә хәҭеи иҷыдоу аҵаратә класс аҿы имҩаԥгахоит.
Аминистр аруаа иахәҭоу аформамаҭәала реиқәыршәара иадҳәаланы иҟоу аҭагылазаашьа дазҵааит. Акомандаҟаҵаҩ Дадын Чачхалиа иҟаиҵаз адыррақәа рыла, аотриад атәыла анапхгара аганахьала ганрацәала адгылареи ацхыраареи роуеит. Аруаа рхыдҵақәеи рмаҵзуреи рынагӡара азы ихымԥадатәиу зегьы рыла еиқәыршәоуп.
«Иарбан усмҩаԥгатәзаалакгьы азы ҳара иахәҭоу аформамаҭәеи ахархәагақәеи ҳамоуп», - ҳәа иҳәеит иара.
Роберт Киут аотриад аруаа разыҟаҵара аҩаӡара шыҳараку азгәеиҭеит. Уи аотриад аҿы иҟоу апроблемақәа ртәы шидыруа, хара имгакәа урҭ рынагӡара шалиршо атәы иҳәеит. Аԥхьа иҟаҵатәу ахыдҵақәа иреиуоуп – Ирласны анырра аҟаҵара азы иҷыдоу Аотриад абаза ахыбра аиҭашьақәыргылареи аспортзал иахәҭоу амаҭәахәқәа рыла аиқәыршәареи.
Атәыла аҩныҵҟатәи аусқәа Рминистрра ахада Аотриад ахь аусзуҩцәа маха-шьахалатәи ацәаҩашәа-мчхаратәи аҟазшьақәа рыла иалԥшааны иалххоит, урҭ зегьы реиҳа иуадаҩу, аҭакԥхықәра зду ахыдҵақәа нарыгӡоит. Урҭ ириуоуп – атерроризми аекстремизми рҿагылара, ацәгьоурақәа рыԥхьырҟәҟәаареи рҿагылареи аҭҟәацәа рхақәиҭтәреи иазку аоперациа ҷыдақәа ирылахәхоит.
Аиԥылара ахыркәшамҭаз аинрал-маиор Роберт Киут аотриад хаҭалатәи аилазаара рзанааҭтәии маха-шьахалатәи разыҟаҵара аҩаӡара шыҳараку азгәеиҭеит.
«Аҵыхәтәантәи ашықәсқәа рзы шәара аихьӡара бзиақәа аашәырԥшуеит, шәганахьала аҽԥынкылара ҳәа акгьы ыҟаӡам, аринахысгьы еиҳа ишеиӷьхо азы агәра ганы сыҟоуп»,– ҳәа инаҵшьны иазгәеиҭеит Роберт Киут.
