Аилак ахантәаҩы Ҭемыр Беииа апарк иахьаҵанакуа абнаԥҟаратә аусура  алыршамзароуп ҳәа инаҵшьны иазгәеиҭеит. Уи иара убас уаҩы дызкьымсыц абнарақәа еиҵагыло абиԥарақәа рзы аиқәырхара, аекологиеи иааҳакәыршаны иҟоу аԥсабареи рыхьчара азы атәылаҿы абнаԥҟаратә ааглыхра  мап ацәктәуп ҳәа игәаанагара иҳәеит.

Ҭемыр Беииа Аԥсны абнаратә ҵакырақәа ҷыдала ахьчара иаҵанакуа аҵакырақәа рыстатус аҭара иазку анорма-зинтә шәҟәынҵақәа рыдкылара дадгылоит.

Аилацәажәарақәа рышьҭахь аилак алахәылацәа аминистрцәа Реилазаара Ақәҵара ааигәа имҩаԥысраны иҟоу Апарламент асессиа аилатәара ахь ацәыргаразы аӡбамҭа рыдыркылеит. Апрофилтә еилакы ари аусшәҟәы ақәшаҳаҭхара иадгылаӡом.

Апаралменттә еилакы алахәылацәа рнаҩс  аилатәара иара убас рхы аладырхәит  аекологиа азы Аԥсны аҳәынҭқарратә Еилакы ахантәаҩы Савели Ҷыҭанаа, Аԥсны Анаукақәа Ракадемиа академик Сергеи Бебиа, Аҳәынҭқарратә абнатә нхамҩа Аусбарҭа анапхгаҩы Анӡор Ашәхаҵаа, Аԥснытәи абнатә анаука-ҭҵааратә ԥышәатә станциа адиректор Витали Леиба.