Черим Нахушев, ахәҭакахьала, атәыла анапхгара аконцерт амҩаԥгараҿы ирҭаз адгылара азы иҭабуп иҳәеит.

«Аԥсны цәыббрамзазы Аиааира агара амш 30-шықәса ахыҵра азгәарҭоит, саргьы асценаҿы сықәгәылоижьҭеи абар шьҭа  30 – шықәса ҵуеит, абас ала еиқәшәеит арыцхәқәа», - ҳәа иҳәеит ашәаҳәаҩы.

Черим Нахушев иконцерт иахьа, рашәарамза 20 рзы Р. Гәымба ихьӡ зху Аԥснытәи аҳәынҭқарратә филармониа аҿы имҩаԥысуеит. Уи иалахәхоит еицырдыруа акәашаратә ансамбль «Кабардинка».

Бадра Гәынба иара убас  Аҳәынҭқара Ахада Аслан Бжьаниа иазԥхьагәаҭоу аусмҩаԥгатә амҩаԥгараҿы излауа ала адгылареи ацхыраареи рыҟаҵара азы анапынҵа шыҟаиҵаз азы асас адырра ииҭеит.  

«Ҳара иаадыруеит Ҟабарда-Балкариа Анапхгара ари ахҭыс ишазҿлымҳау. Агәра шәсыргоит, ҳаргьы ари аконцерт аиҿкаара алахәхара ҳшазхиоу».

Аиԥылара ахыркәшамҭаз Аҳәынҭқарра Ахада Ихаҭыԥуаҩ Черим Нахушев Фазиль Искандер исахьа зну агәаларшәагатә ԥсар ҳамҭас ииҭеит.  

Аиԥылара иара убас ихы алаирхәит атәыла акультура аминистр Даур Ақаҩба.