Аҟәа. Рашәарамза 14, 2023 шықәса. Аԥсныпресс. Аԥсныҟа иаауаз апассаџьыртә дәыӷбақәа «Москва – Аҟәа», иара убас «Санкт-Петербург – Аҟәа аихамҩатә станциа «Цандрыԥшь иаанкылан. Шьҭахьҟа урҭ дәықлоит дусы реихшанҵа инақәыршәаны.
Адәыӷбақәа рпассаџьырцәа зегьы автотранспорт ала рымҩа ахьынӡахо астанциақәа рҟынӡа инаргоит, ҳәа Аԥсныпресс ахь адырра ҟарҵеит Ареспубликатә Унитартә Наплакы «Аԥснытәи Аихамҩа» апресс-маҵзура аҿы. Аҟәантәи идәықәлараны иҟаз апассаџьырцәа адәыӷбақәа рныҟәара аихшанҵа инақәыршәаны, Аҟәантәи, Афонынтәи, Гәдоуҭантәи, Гагрантәи Цандрыԥшь аихамҩатә станциа аҟынӡа рнагара еиҿкаахоит.
Адәыӷба «Ҭҟәаԥс – Гагра» шьҭахьҟа аихамҩатә станциа "Имеретинский курорт" ахь ирхынҳәын. Афымцадәыӷба «Ласточка» ареисқәа аамҭала иаанкылахоит аихамҩала аныҟәара ҩаԥхьа иалагаанӡа.
Иахьатәи амш азы Аԥснытәи Аихамҩа автотранспорт ала рыиагара мҩаԥнагараны иҟоуп зықьҩык инареиҳаны апассаџьырцәа.
Ақәыршҩи аӡыҳәынҵәатә ҩарӡқәеи ирыхҟьаны Гагра араион иахьаҵанакуа аихамҩақәыԥсеи афымцацәаҳәа ашьаҟақәеи ааха роуит.
