Аҟәа. Рашәарамза 9, 2023 шықәса. Аԥсныпресс. Аԥсныҟа усуратә визитла иааит Урыстәылатәи Афедерациа Анапхгара ахантәаҩы ихаҭыԥуаҩ Алеқсандр Новак напхгара зиҭо урыстәылатәи аделегациа.
Урыстәылатәи аделегациа аилазаараҿы иҟоуп: аҳәаанырцәтәи атәылақәа арегионбжьаратәии акультуратә рымадаразы Урыстәылатәи Афедерациа иҟны иҟоу Аусбарҭа анапхгаҩы Игорь Маслов, аекономикатә ҿиара аминистр ихаҭыԥуаҩ Дмитри Вольвач, аенергетика аминистр ихаҭыԥуаҩ Евгени Грабчак, арра-техникатә усеицуразы Афедералтә маҵзура адиректор ихаҭыԥуаҩ Михаил Бабич.
Аԥсни Урыстәылеи ирыбжьоу аҳәынҭқарратә ҳәаа аужьҭра-гәаҭаратә Пункт «Псоу» аҿы асасцәа ирԥылон Аԥсны Аҳәынҭқарра Ахада ихаҭыԥуаҩ Бадра Гәынба, Аԥсны иҟоу Урыстәылатәи Афедерациа Ацҳаражәҳәаҩ Михаил Шургалин, Аҳәынҭқарра Ахада Иусбарҭа анапхгаҩы Џьансыхә Нанба, аԥыза-министр ихаҭыԥуаҩ, аекономика аминистр Кристина Озган, Гагра араион ахада Иури Ҳагәышь.
Урыстәылатәи аделегациа авизит апрограмма аҿы иҟоуп:
– Апансионатқәа реидгылара «Акурорт Пицунда», Пицундатәи аныхабааи (Апостол Андреи Аԥхьанаԥхьа иныхабаа) рҭаара;
– Гәылрыԥшь араион ахь ацареи В.Г.Арӡынба ихьӡ зху жәларбжьаратәи аҳаирбаӷәаза «Аҟәа» аҭаареи;
– Аҟәаҟа аареи Урыстәылатәи Афедерациа Анапхгара Ахантәаҩы ихаҭыԥуаҩ Алеқсандр Новаки Аҳәынҭқарра Ахада Аслан Бжьаниеи реиԥылареи;
– Урыстәылатәи Афедерациеи Аԥсны Аҳәынҭқарреи рыбжьара асоциал-економикатә усеицура азы Анапхгарабжьаратәи акомиссиа ацхантәаҩцәа реиԥылара;
– Аҟәа агаҿа шьапыла ақәсреи С.Ҷанба ихьӡ зху Аԥсуа драматә театр аҭаареи;
Асабшаҽны, рашәарамза 10 рзы, Алеқсандр Новак аӡиа Риҵеи «Сталин идачеи», иара убас Гәдоуҭа араион Мысра аҳаблаҿы иҟоу «Горбачиов иҳәындачеи» дырҭаараны дыҟоуп.
