Аҟәа. Рашәарамза 9, 2023 шықәса. Аԥсныпресс Имҩаԥысит Аҧсны Аҳәынҭқарра Ахада Аслан Бжьаниеи Урыстәылатәи Афедерациа Аиҳабыра Ахантәаҩы ихаҭыԥуаҩ Алеқсандр Новаки реиԥылара.
«Бзиала шәаабеит ҳәа шәасҳәоит Аԥсныҟа. Даара сеигәырӷьоит иахьа ҳтәыла шәахьаҭааз. АԤсны анапхгареи ҳтәылауааи Шәара шәаара агәыӷра дуқәа адырҳәалоит, избан акәзар шәареи ҳареи хра злоу азҵаарақәа ҳрылацәажәоижьҭеи маҷ ҵӡом. Сара агәра згоит, шәаара Шәаргьы саргьы ҳнапы злаку азҵаарақәа рыӡбара аус ишацхраауа. Даҽазныкгьы бзиала шәаабеит Аҧсныҟа», - иҳәеит Ахада, асас аҧсшәа иаҳәо.
Алеқсандр Новак аҳәынҭқарра Ахада Аԥсныҟа ааԥхьара ахьииҭаз азы иҭабуп ҳәа иаиҳәеит. «Афедералтә усбарҭақәа рхаҭарнакцәагьы злахәыз ҳделегациа ашҟа иашәырԥшыз азҿлымҳарееи аԥхарра зҵоу аиҧылареи рзы иҭабуп ҳәа шәасҳәарц сҭахуп. Аԥсны - ҳара ҳастратегиатә партниоруп ҳәа иҳаԥхьаӡоит, адәныҟаполитикатә усураҟнеиԥш, ахәаахәҭра - економикатә усеицура арҿиара аганахьалагьы. Ҳара ҭоурыхла аизыҟазаашьа бзиақәа ҳабжьоуп, иахьа ҳаимадарақәа активла аҿиара иаҿуп. Аԥсны аекономика, аҩныҵҟатәи азеиԥш аалыҵгьы аизырҳара мҩаԥысуеит. Иара убас, Урыстәыла финансла ацхыраара ҟанаҵоит аинфраструктуратә проектқәа рынагӡаразы, афинанстә ҭышәынтәалара алыршаразы.
Ахәаахәҭра - економикатә еикәшара аиҳара иаҿуп: ҵыҧхтәи ашықәс ала уи 73% рыла иазҳаит. Сара иҵегьы алшарақәа ыҟоуп ҳәа исыԥхьаӡоит еиуеиԥшым ахырхарҭақәа рыҟны. Раҧхьа иргыланы, атуризм аусхк аҟны, аинвестициатә проект ҿыцқәа рыҟны, урҭ арахь аҧсшьаҩцәа радыԥхьаларазы инагӡазар алшоит. Ари иара убас аҳаиртә баӷәаза аиҭашьақәыргылара ауп, хыԥхьаӡара рацәала аҧсшьаҩцәа раара алыршаразы, аҿиара иаҿу асоциалтә усхк. Уи ауаа рыԥсҭазаара аиӷьтәреи ҳажәларқәа рыбжьара иҟоу аизыҟазаашьа бзиақәа аԥхьаҟагьы рырҿиареи зылшо хырхарҭоуп аҟнытә ацхыраара аҭазароуп», - иҳәеит Новак. Уи иаҵшьны иазгәеиҭеит иахьа урыстәылатәи аделегациа аара абри хықәкыс ишамоу.
Аслан Бжьаниа, иара убасгьы иазгәеиҭеит, урыстәылатәи аиҳабыратә делегациа Аԥсныҟа раара Аԥсны атәылауаа зегьы рганахьала азҿлымҳара ду шамоу. «Аԥсшьараамҭа алагамҭазы аусуратә гәалаҟазаара ҳамоуп, ҳазлацәажәо апроектқәа аусура иалагар ҳҭахуп. Ахәҭак ҟаҳҵахьеит, иаанхаз ахәҭа ҳаԥхьаҟа ишьҭоуп. Аҳаиртә еимадара аусура иаҳзаларгар, ари аус иадҳәалоу ауаа зегьы Аԥсны атәылауаа рзы аԥааимбарҵас ирыхәаԥшлоит, убриаҟара аҵак ду амоуп ҳара ҳзы»,- ҳәа иҳәеит Аҳәынҭқарра Ахада.
