Аҟәа. Лаҵарамза 5, 2023 шықәса. Аԥсныпресс. Жәлар Реизара-Апарламент Аиҳабы Лаша Ашәба адукаттә еилазаара ахаҭарнакцәа дырԥылеит.
Аиԥылара рхы аладырхәит адукатцәа Рпалата ахантәаҩы Константин Чагәаа, адукат Ҭамаз Кецба, Урыстәылатәи Афедерациа адукатура ахаҭарнакцәа – Нхыҵ Кавказ ареспубликақәеи Башкортостани адукаттә палатақәа рхаҭарнакцәа, иара убас Аԥсны Жәлар Реизара-Апарламент Аппарат анапхгаҩы Вадим Бжьаниа.
Аиԥылара Аԥсны Аҳәынҭқарра адукатура 100-шықәса ахыҵра азгәаҭара иазку аусмҩаԥгатәқәа рымҩаԥгара апрограмма аҳәаақәа ирҭагӡаны имҩаԥысит.
Лаша Ашәба Аԥсны адукатцәа шәышықәсатәи риубилеи рыдиныҳәалеит. «Шәара шықәсы рацәа инеиԥынкыланы ҳтәылауаа рзакәантә интерессқәеи рзинқәеи рыхьчараҿы шәгылоуп. Ҳара – азакәанԥҵаҩцәа ҳзы, ари аусхкы даараӡа аҵак ду амоуп», - ҳәа иҳәеит иара.
Аныҳәатә усмҩаԥгатәқәа рылахәхаразы Аԥсныҟа иааз асасцәа рахь ихы рханы Апарламент Аиҳабы иҳәеит: «Бзиала шәаабеит, ҳаҭыр зқәу аҩызцәа. Ҳара даараӡа ҳаигәырӷьоит иахьа иазгәаҳҭо адвокатура аиубилеи ахь ас еиԥш зыҽраԥшра бзиоу аделегациа ахьаҳзааз. Агәра ганы сыҟоуп ҳара аринахысгьы, егьырҭ хра злоу ахҭысқәа рзы еиҭа ҳшеиқәшәало азы».
Апарламент Аиҳабы даара аԥхарра ацны имҩаԥысыз аиԥылара азы иҭабуп ҳәа иаҳәо, асасцәа Урыстәылеи Аԥсни адукатцәа русеицура аринахысгьы аҿиара шаиуо инаҵшьны иазгәарҭеит.
