Аҟәа. Лаҵарамза 3, 2023 шықәса. Аԥсныпресс. Атәыла аԥыза-министр Алеқсандр Анқәаб Аԥсны аҭоурых-культуратә ҭынха ахьчара азы Аҳәынҭқарратә усбарҭа анапхгаҩы Гарри Сангәылиа, ауаажәларратә усзуҩ Белла Аршба, анардкыларатә еиҿкаара ахаҭарнак Русҭам Цәеиба алархәны аиашахаҵаратә культтә хыбрақәа реиқәырхара азҵаарақәа рыла аусуратә еилатәара мҩаԥигеит.
Аҳәынҭқарра Ахада А. Гь. Бжьаниа инапынҵақәа рҳәаақәа ирҭагӡаны имҩаԥысыз аусуратә еилатәара аҿы аҭынха аиқәырхара азы раԥхьатәи ауснагӡатәқәа рымҩаԥгара иазырхоу зыԥшра ҟамҵакәа аҳәынҭқарратә зхьаԥшра иазку аусмҩаԥгатәқәа рынагӡара иалацәажәеит. Иалацәажәеит раԥхьа иргыланы Бедиатәи аныхабааи Мықәтәи акафедралтә уахәамеи рхыбрақәа рҭагылазаашьа.
Алеқсандр Анқәаб Белла Аршба адинхаҵара-культуратә ҵакы змоу абаҟақәа реиқәырхареи реиҭашьақәыргылареи ирыдҳәалоу азҵаарақәа рыӡбара активла лхы ахьалалырхәо азы иҭабуп ҳәа леиҳәеит.
Аԥыза-министр анардкыларатә еиҿкаара аҵарауаа рабжьгарақәа инарықәыршәаны ажәалагалақәа реиқәыршәареи анаҩс ахәаԥшреи ашьақәырӷәӷәареи рзы атәыла Анапхгара ахь анашьҭреи рзы анапынҵақәа аиҭеит.
