Аҟәа. Лаҵарамза 3, 2023 шықәса. Аԥсныпресс. Аԥсны Аҳәынҭқарра Ахада зхадараҿы дыҟоу аԥснытәи аделегациа актәи Кавказтәи аинвестициатә цәыргақәҵа аартра иазку агәырӷьаратә усмҩаԥгатә иалахәын.
Ацәыргақәҵа мҩаԥысуеит Аминералтә ӡқәа рыҟны, ҳәа адырра ҟанаҵоит Аҳәынҭқарра Ахада ипресс-маҵзура.
Ацәыргақәҵа иаҭааит Урыстәылатәи Афедерациа арегионқәа зегьы рҟынтә асасцәа, Нхыҵ-Кавказтәи афедералтә округ ахадацәа.
Ацәыргақәҵа алахәцәеи асасцәеи аԥсшәа реиҳәеит Урыстәылатәи Афедерациа Аиҳабыра Ахантәаҩы ихаҭыԥуаҩ Алеқсандр Новак. Иара иазгәеиҭеит азҿлымҳара азҭо аганқәа злархәу аусмҩаԥгатә амҽхак аҭбаара, иҳәеит Кавказтәи аинвестициатә цәыргақәҵа Ставропольтәи атәылаҿацә ахь аинвестициа адыԥхьалара аимпульс ҿыц шанаҭо.
«Иахьа имҩаԥысуеит хыԥхьаӡара рацәала аиҿцәажәарақәа, апленартә сессиақәа, уа ирылацәажәараны иҟоуп зеиӷьыҟам арегион аҿиареи аинвестициа адыԥхьалареи ирызку азҵаарақәа. Ашәҟәы иҭагалоу алахәцәа рхыԥхьаӡара х-нызқьҩык инареиҳаны иҟоуп. Ара иҟоуп арегионқәа рхадацәа, абизнес ахаҭарнакцәа. Агәра згоит, иҿыцу аиқәшаҳаҭрақәа маҷымкәа ишрыҵаҩхо. Ақәҿиарақәеи, алҵшәа бзиа змоу аусуреи шәзеиӷьасшьоит. Ацәыргақәҵа аартра шәыдысныҳәалоит", - ҳәа иҳәеит Алеқсандр Новак.
Нхыҵ-Кавказтәи Афедералтә округ аҟны иҟоу Урыстәылатәи Афедерациа азинмчы змоу ахаҭарнак Иури Чаикеи Ставропольтәи атәылаҿацә агубернатор Владимир Владимиров арегион зегьы азы ацәыргақәҵа иамоу аҵакы инаҵшьны иазгәарҭеит.
