Аҟәа. Лаҵарамза 2, 2023. Апсныпресс. Атәыла аԥыза-министр Алеқсандр Анқәаб Урыстәылатәи Афедерациа анаукеи иреиҳаӡоу аҵарадырреи рминистр ихаҭыԥуаҩ Константин Могилевски диԥылеит, ҳәа адырра ҟанаҵоит Аԥсны аминистрцәа Реилазаара апресс-маҵзура.
Аганқәа анаукеи аҵарадырреи русхки, иара убас азакәанԥҵаратә усхки рҿы аусеицура аҿиара иадҳәалоу азҵаарақәа жәпакы ирылацәажәеит, анаукатә еилазаарақәеи егьырҭ анаука-ҵарадырратә усура аҿиара аинститутқәеи реицапҵара азҵаарақәа ирзааҭгылеит.
Константин Могилевски урыстәылатәи аган аринахысгьы Аԥсны аконсультативтәи ахархәаратәи ацхыраара аҭара ишазхиоу азгәеиҭеит.
Алеқсандр Анқәаб Урыстәыла аҵареи анаукеи рминистрра анапхгара иҟанаҵо ацхыраареи аусеицуреи рзы иҭабуп иҳәеит. Уи ҩаԥхьа Аԥсны Анапхгара апроект ҿыцқәа рынагӡара ишазҿлымҳау азгәеиҭеит.
Аԥсуа ган аҟынтәи аиԥылара иара убас рхы аладырхәит аԥыза-министр ихаҭыԥуаҩ Сергеи Пустовалов, аԥыза-министр ихаҭыԥуаҩ, аекономика аминистр Кристина Озган, аҵара аминистр Инал Габлиа, аекологиа Аинститут адиректор Роман Дбар.
