Аҟәа. Мшаԥымза 25, 2023 шықәса. Аԥсныпресс. Атәыла аԥыза-министр Алеқсандр Анқәаб урыстәылатәи аделегациа ахаҭарнакцәа, Актәи Аԥснытәи амедицинатә форум алахәылацәа идикылеит.
Аиԥылара рхы аладырхәит аԥыза-министр ихаҭыԥуаҩцәа Сергеи Пустовалов, Владимир Делба, агәабзиарахьчара аминистр Едурад Быҭәба, Аԥсны иҟоу Урыстәылатәи Афедерациа ацҳаражәҳәаҩ Михаил Шургалин, ҳәа адырра ҟанаҵоит аминистрцәа Реилазаара апресс-маҵзура.
Асасцәа аԥсшәа раҳәо, аԥыза-министр афорум аҿы иахьалахәхаз, насгьы ганрацәала иҟарҵаз ацхыраареи адгылареи рзы иҭабуп ҳәа реиҳәеит.
«Ҳара раԥхьаӡа акәны амедицинатә форум мҩаԥаагоит. Сара сгәаанагарала ари ахҭыс ҳара ҳзы аҵак ду аҵоуп, агәыӷрагьы сымоуп ас еиԥш иҟоу аформат аҿы аколлегацәа реизыҟазаашьақәеи реимадареи акыр хра злоу традицианы ишышьақәгыло», -ҳәа иҳәеит Алеқсандр Анқәаб.
Аԥыза-министр ҷыдала иазгәеиҭеит, «аԥснытәи амедицина урыстәылатәи рколлегацәеи рҩызцәеи рыцхыраареи рыдгылареи ирыбзоураны хәыҷы-хәыҷла ашьапы иқәгылоит, урыстәылатәи афинанстә цхыраарала амедицинатә усбарҭақәа жәпакы еиҭашьақәыргылахеит, ҳара ҳастудентцәа – раԥхьаӡа иҳақьымхараны иҟоу, Урыстәылатәи Афедерациа еиуеиԥшым аҵараиурҭақәа рҿы аҵара рҵоит. Иара убас, аԥснытәи апациентцәа Урыстәыла агәабзиарахьчара аусбарҭақәа рҿы зыквалификациа ҳараку ацхыраара роуеит. Иазгәаҭатәуп, уажәы, ҳтәылақәа рҟынтәи аспециалистцәа рзанааҭтә форум ала ҳара аусеицура иҿыцу аҩаӡара ахь ҳахьыиасуа акырӡа аҵанакуеит».
Урыстәыла анаукақәа Ракадемиа академикцәа Алеқсандр Караулов, Константин Лиадов, Сергеи Пузин, Иури Рахманин, Урыстәыла анаукақәа Ракадемиа алахәыла-корреспондентцәа Анатоли Быков, Иури Пиголкин, Урыстәыла Иԥсабаратәу анаукақәа Ракадемиа (РАЕН) академик Евгени Ачкасов, Урыстәыла Иԥсабаратәу анаукақәа Ракадемиа (РАЕН) алахәыла-корреспондент Владимир Николенко, апрофессор Валентин Шаробаро Аԥсни Урыстәылеи рмедицинатә еилазаарақәа рыбжьара аҩганктәи аусеицура аеффективра ашьҭыхра азы ргәаанагарақәа рҳәеит.
Академик Иури Рахманин аԥсуа ган иҟанаҵаз ааԥхьареи иҳараку аҩаӡараҿы аусмҩаԥгатә аиҿкаареи рзы ҭабуп ҳәа иҳәеит. Убри аан уи афорум иаҵоу актуалра азгәеиҭеит. «Аԥсны Анапхгара афорум амҩаԥгареи апрофессионалтә еимадара иахьазҿлымҳау урҭ рактивизациа иахьалаху акырӡа аҵанакуеит ҳәа исыԥхьаӡоит. Шәтәыла амедицинатә туризм аиҿкааразы, асанатор-курортә комплекс аиҭашьақәыргыларазы, ареабилитациа амҩаԥгаразы апотенциал ду амоуп. Иарбоу ахырхарҭақәа ҷыдала ахшыҩзышьҭра аҭара хра злоу усны иҟоуп», - ҳәа иҳәеит академик Иури Рахманин.
Урыстәылатәи аделегациа алахәылацәа анаукатә, азакәанԥҵаратә, акадртә, апрактикатә форматқәа рҿы аҩганктәи аусеицура ишазхиоу азгәарҭеит.
Аиԥылара ахыркәшамҭаз аганқәа агәалашәаратә ҳамҭақәа еимырдеит.
