Сара агәра згоит ари афорум аус дуқәа ирылагамҭаны ишыҟало, иреиӷьу аҭҵаарадырратәи амедицинатәи коллективқәа рылшарақәа еибыҭаны, аҭҵаарадырреи, атехнологиақәеи, апрактикеи, насгьы, раԥхьа инаргыланы, ари  аусура алҵшәақәа зызку ауаа рзы хәарҭа ду аманы иҟалоит», - ҳәа иазгәаҭоуп Аҳәынҭқарра Ахада идныҳәалара аҿы.

I Аԥснытәи амедицинатә форум алахәылацәа ирыдныҳәалеит иара убас ААУ аректор, Урыстәыла Иԥсабаратәу анаукақәа Ракадемиа академик, Аԥсны Анаукақәа Ракадемиа академик, апрофессор Алеко Гәарамиа, Урыстәыла Иԥсабаратәу анаукақәа Ракадемиа академик, Урыстәыла Анаукақәа Ракадемиа академик  Иури Рахманин, Аԥсны Анаукақәа ракадемиа апрезидент Зураб Аџьапуа, Аԥсны Анаукақәа Ракадемиа Аексперименталтә паталогиеи атерапиеи Ринститут адиректор Зураб Амқәаб, Урыстәыла Иԥсабаратәу анаукақәа Ракадемиа академик Евгени Ачкасов.  

Аԥсны Анаукақәа Ракадемиа апрезидент Зураб Аџьапуа асасцәа бзиала шәаабеит ҳәа раҳәо, Аԥсны агеографиатәии аԥсабаратәии аҭагылазаашьақәа ҳасаб азуны уахәаԥшуазар, апациентцәа рреабилитациа амҩаԥгаразы зеиӷьаҟам ҭыԥны иҟалар алшоит ҳәа иазгәеиҭеит.

«Иахьа арратә операциа ҷыда анеымҩаԥысуа аамҭазы уи акыр актуалра аланы иҟоуп. Амедицина аҿиара, акадрқәа разыҟаҵара,  рзы ихадараны иҟоуп урыстәылатәи амедицинатә еилазаареи ҳареи ҳусеицура.  Ари аусеицура аамҭак азы, аиҳарак Асовет Еидгыла анеилабга ашьҭахь, Аԥсны Аџьынџьтәылатәи еибашьра аекономикатә хҟьаԥҟьақәа, уҳәа инарымаданы маҷк иԥсыҽханы иҟан. Уажәы Аԥсни Урыстәылеи рыбжьара ҿыц ишьақәгылаз  аекономикатәи аполитикатәи аизыҟазаашьақәа раан аусеицура аҳәаақәа хәыҷы-хәыҷла рыҽдырҭбаауеит. Иахьатәи афорум уи зеиӷьаҟам ала иарҵабыргуеит», – ҳәа иҳәеит Зураб Аџьапуа.

Урыстәыла Анаукақәа Ракадемиа академик Иури Рахманин урыстәылатәи аҳақьымцәа, Урыстәыла анаукақәа Ракадемиа аҵарауаа, Урыстәыла Иԥсабаратәу анаукақәа Ракадемиа Апрезидиум рыхьӡала амедицинатә форум алахәылацәа  дрыдныҳәалеит, ақәҿиарақәагьы рзеиӷьаишьеит.

Урыстәыла Иԥсабаратәу анаукақәа Ракадемиа академик Евгени Ачкасов, афорум – анаукеи амедицинеи русхкы аҿы аԥсны-урыстәылатәи аизыҟазаашьақәа рыҿиара аҿы иҿыцу етапны иҟоуп ҳәа иазгәеиҭеит.

«Урыстәыла Анаукақәа Ракадемиа, Урыстәыла Иԥсабаратәу анаукақәа Ракадемиа аҵарауаа, апрофесорцәа, академикцәа рыла ишьақәгылоу  ари афорум аилазаара лассы-лассы иуԥыло  цәырҵраны иҟам. Ари аҩыза зыҟаларымызт Аԥсны агәабзиарахьчара Аминистрра аԥшьгарада», - ҳәа иҳәеит Евгени Ачкасов.

Афорум иалахәуп Аҳәынҭқарра Ахада Ихаҭыԥуаҩ Бадра Гәынба, Жәлар Реизара-Апарламент Аиҳабы  Лаша Ашәба, Аԥсны иҟоу Урыстәыла Ацҳаражәҳәаҩ Михаил Шургалин, Апарламент адепутатцәа, атәыла Анапхгара алахәылацәа.

Афорум аиҿкааҩцәа – Аԥсны агәабзиарахьчара Аминистрра, ауаажәларратә еиҿкаара «Аԥсны ареабилитологцәа Рассоциациа», иара убас  урыстәылазегьтәи ауаажәларратә еиҿкаара «Урыстәылатәи амедицинатә еилазаара».