Аҟәа. Мшаԥымза 10, 2023 шықәса. Аԥсныпресс. Адиспансеризациа аналага инаркны амедицинатә гәаҭара иахысит 150 – ҩык ашколхәыҷқәа. Мызкы иалагӡаны адиспенсеризациа мҩаԥган Бедиа, Аацы, Мҵара, Ҭхьына, Арасаӡыхь ақыҭақәа рҿы.
«Адиспансеризациа амҩаԥгара аԥшьызгаз Адунеизегьтәи аԥсуа-база жәлар Рконгресс ауп. Ҳара уи азы иҭабуп ҳәа раҳҳәар ҳҭахуп. Ас еиԥш аусмҩаԥгатә даара аҵакы дууп еиҵагыло аҿар рзы. Аҭаацәа ианаамҭоу ирдырыр алшоит рхәыҷқәа ирыхьуа ачымазарақәа ртәы, ианаамҭоу уи рыхәышәтәрагьы иалагоит», – ҳәа Аԥсныпресс акорреспондент иҿцәажәо ирҳәеит атәыла агәабзиарахьчара Аминистрра аҟны.
Ахәыҷы игәабзиара азеиԥш ҭагылазаашьа аилкааразы ишьа ргоит.
Адиспансеризациа амҩаԥгара аҳәаақәа ирҭагӡаны ахәыҷқәа дрыхәаԥшуеит аневролог, алор, аокулист, апедиатр. Ахәыҷқәа ркардиограмма ҭырхуеит, анаҩс москватәи акардиологцәа уи иахәаԥшуеит алкаагьы ҟарҵоит. 14-шықәса ирхысхьоу ашколхәыҷқәа афлиуорографиа ҳәа изышьҭоу апроцедура иахысуеит. Амедицинатә рбагақәа рыла аультрабжьытә ҭҵаара (УЗИ) мҩаԥгахоит.
Ашколхәыҷқәа реиҳарак рҿы иуԥыло ачымазарақәа иреиуоуп иҽеим рыблабара, аневрологиатәии астоматологиатәи ачымазарақәа. Иазгәаҭатәуп, ашколхәыҷқәа аӡәырҩы аҳақьым рхы идмырбеижьҭеи акрааҵуеит, урҭ ашәҟәы иҭагалоуп. Мшаԥымза 18 рзы адиспансеризациа мҩаԥгахоит Очамчыра араион Баслахә ақыҭан.
