Аҟәа. Мшаԥымза 14, 2023 шықәса. Аԥсныпресс. Аԥсны аҳәынҭқарратә ҳазылхратә Еилакы аҿы уаанӡа аҳазылхратә шәҟәҭагалара азы аспециалист иаттестат аиуразы азыҳәамҭақәа алазҵахьаз аброкертә еилазаарақәа рхаҭарнакцәа рзы аквалификациатә ԥышәара мҩаԥысит, ҳәа адырра ҟанаҵоит Аԥсны аҳәынҭқарратә ҳазылхратә Еилакы аофициалтә саит.
Аквалификациатә ԥышәара х-етапкны ишьақәгылан — актәи аетап аҿы акандидатцәа ҿырҳәала аҳазылхратә деклорациа ахарҭәаара иадҳәалоу азҵаарақәа рҭак ҟарҵон, анаҩс иҩны атестқәа иахысуан, аҵыхәтәаны акандидатцәа аидарамҩангаратә ҳазылхратә декларациа хадырҭәаауан.
Аквалификациатә ԥышәара рыдыркылон Аԥсны аҳәынҭқарратә ҳазылхратә Еилакы амаҵурауаа рыла ишьақәгылоу аԥышәаратә комиссиа. Аттестациатә комиссиа аилазаара Аҳәынҭқарратә ҳазылхратә Еилакы ахантәаҩы ила ашьақәырӷәӷәахеит.
Аттестациа қәҿиарала иахысыз ирыҭахоит аҳазылхратә шәҟәҭагалара азы аспециалист иаттестат.
