Аҟәа. Мшаԥымза 8, 2023 шықәса. Аԥсныпресс. Аԥсны агәабзиарахьчара аминистр Едуард Быҭәба мшаԥымза 24-25 рзы имҩаԥысраны иҟоу актәи аԥснытәи амедицинатә форум амҩаԥгара аҽазыҟаҵара иазкны аусуратә еилатәара мҩаԥигеит.
Агәабзиарахьчара Аминистрра апресс-маҵзура иҟанаҵо адыррақәа рыла, аилатәара аҿы иалкаахеит асасцәа рсиа, иара убас афорум амҩаԥгара аҭыԥ, атехникатәии аиҿкааратәи азҵаарақәа ирылацәажәеит.
«Ари афорум даара аҵак ду аҵоуп атәыла амедицинатә еилазаара зегьы азы, убри аҟнытә ҳара уи иҳараку аҩаӡара аҿы имҩаԥаагароуп», – ҳәа иазгәеиҭеит агәабзиарахьчара аминистр.
Афорум аиҿкааҩцәа – Аԥсны агәабзиарахьчара Аминистрра, Аԥсны ареабилитологцәа Рассоциациа, Зҭакԥхықәра Ҳәаақәҵоу Аилазаара «Урыстәылатәи амедицинатә Еилазаара».
