Лара Аԥсны акультура аминистр Даур Ақаҩба ҩ-ҳәынҭқаррак рыжәларқәа реизааигәатәра иазкны активла инаигӡо аусура азы иҭабуп ҳәа иалҳәеит.
Даур Ақаҩба аҭак аҳасабала «Аԥсны акультура ахәҭаки ҳагәқәа рыхәҭаки Аахыҵ Уаԥстәыла ажәлар ҳамҭас рыҭара алшап» ҳәа агәыӷра шимоу ааирԥшит. Иара, акультура Амшқәа Радмила Ӡагаева раԥхьаӡа ҭелла лыҿцәажәара аан иазԥхьагәаҭахеит ҳәа иазгәеиҭеит. Уи иажәақәа рыла, Аахыҵ Уаԥстәыла арҿиаратә коллективқәа аҭак аҳасабала Аԥсныҟа раара гәахәара дула ишрыдыркыло азгәеиҭеит.
Даур Ақаҩба Аԥсны Аҳәынҭқарра Ахада Аслан Бжьаниа Аахыҵ Уаԥстәыла Ахада Алан Гаглоев ихьӡала иааишьҭыз адныҳәаларатә цҳамҭа даԥхьеит. Уи атекст аҿы, ахәҭакахьала иазгәаҭоуп:
«Ҳаҭыр зқәу Алан Едуард-иԥа! Гәык-ԥсыкала ишәыдысныҳәалоит Аԥсны акультура амшқәа Аахыҵ Уаԥстәыла раартра. Ҳажәларқәа ашәышықәсақәа ирылганы иахьа уажәраанӡа еиқәырханы иааргеит рыԥсҭазаашьатә принципқәа, рытрадициақәа, зегьы реиҳа ихадоу – ҳазхылҵыз иаҳзаанрыжьыз ҳажәларқәа реиҩызара. Аԥсны акультура Аминистрра арҿиаратә коллективқәа иреиӷьу аномерқәа нарыгӡараны иҟоуп, ҳажәларқәа ирыбжьоу аимабзиаратә еизыҟазаашьақәа еиҳагьы изырӷәӷәараны иҟоу аиҩызареи акзаареи аадырԥшуеит. Аахыҵ Уаԥстәыла ажәлар зегьы ирзеиӷьасшьоит аҭынчреи аизҳазыӷьареи!»
