Аҟәа. Хәажәкырамза 31, 2023 шықәса. Аԥсныпресс. Атуризми асасдкылареи русхкы аҿы аусеицура аҿиара хықәкыс иҟаҵаны, атуроператорцәа – Зҭакԥхықәра Ҳәаақәҵоу Аилазаара «Вояж» Аԥсны Аҳәынҭқарра Зҭакԥхықәра Ҳәаақәҵоу Аилазаара «Тархан» Ареспублика Башкортосҭан – атуризм аусхкы аҿы аусеицура азы аиқәшаҳаҭра рнапы аҵарҩит.
«Атуризм асоциал-економикатәи акультуратә ԥсҭазаареи рҿы акырӡа зҵазкуа усхкны иԥхьаӡаны, Аԥсни Башкортосҭани, атуризм аусхкы аҿы акыраамҭатәи аусеицура азы азхиара аарԥшуа, уи азы ихымԥадатәиу аиҿкааратәи, азинтәи, аметодологиатә шьаҭақәа раԥҵара азы агәазыҳәара рыманы, атуризм аусхкы аҿы аусеицура азы аиқәшаҳаҭра абжьаҵара аҟынӡа инаӡеит», ҳәа иазгәаҭоуп аиқәшаҳаҭра апреамбула аҿы.
Аганқәа атуристтә индустриа аҿиара аганахьала аизыҟазаашьақәа дырӷәӷәалоит, аҩганк ирзыфеиданы атуристцәа рхыԥхьаӡара аизырҳара азы иманшәалоу аҭагылазаашьақәа аԥырҵалоит, хықәкыла иаауа атуристцәа ргәыԥқәа зызҿлымҳау хадара злоу атуристтә сервисқәа раалыҵ аӡыргара мҩаԥыргалоит, аганқәа ртерриториақәа рыҟны иҟоу атуристтә ресурсқәа рзы адыррақәа атуристцәа рызнагара аҩаӡара ашьҭыхра алдыршалоит.
