Аҟәа. Хәажәкырамза 31, 2023 шықәса. Аԥсныпресс. Атәыла аекономика Аминистрра аҟны имҩаԥысит аԥыза-министр ихаҭыԥуаҩ, аекономика аминистр Кристина Озгани Аԥсныҟа аусуратә визитла иааз Ареспублика Башкортосҭан аделегациа ахаҭарнакцәеи реиԥылара, ҳәа иаанацҳауеит Аԥсны аекономика Аминистрра апресс-маҵзура.
Аиԥылара рхы аладырхәит Ареспублика Башкортоҭан Анапхгара аԥыза-министр актәи ихаҭыԥуаҩ – акономикатә ҿиареи аинвестициатә политикеи рминистр Русҭам Муратов, адәныҟаекономикатә еимадарақәеи аконгресстә усуреи рминистр Маргарита Болычиовеи ааглыхра, енергетикеи аинновациақәеи рминистр ихаҭыԥуаҩ – Валери Галиев.
Аԥсуа ган аҟынтәи аԥыза-министр ихаҭыԥуаҩ, аекономика аминистр Кристина Озган лнаҩс аиԥылара рхы аладырхәит аԥыза-министр ихаҭыԥуаҩ, афинансқәа рминистр Владимир Делба, аекономика аминистр ихаҭыԥуаҩцәа Теимураз Миквабиеи Емма Голеузовеи.
Ареспубликақәа рыбжьара ахәаахәҭра-економикатә усеицура аҿиара иазкыз аиԥылара аҿы аганқәа аекономикатә усеицура иадҳәалоу азҵаарақәа жәпакы ирылацәжәеит.
«Башкириеи Аԥсни акыр шықәса раахыс аимадарақәа рыбжьоуп, урҭ шьақәгылеит Аԥсны азы акыр иуадаҩыз аамҭа азы. Ҳҭоурых аҟынтәи ҳара иаадыруеит аибашьра анцоз ахәрақәа зауз ҳаибашьцәа Башкортосҭан амедицинатә цхыраара шроуаз, 100-ҩык инареиҳаны астудентуәа Башкортосҭан аҵараиурҭақәа рҿы аҵара рҵеит, иреиҳаӡоу аҵарадырра роуит. Мҽхакы ҭбаала агуманитартә цхыраара Аԥсныҟа иаауан. Ҳара уи ҳхашҭраны ҳаҟаӡам. Иахьа ҳара ҳаизыҟазаашьақәа иҿыцу аҩаӡара ахь ицәырҵуеит, аперспектива азы апланқәа шьақәҳаргылоит», - ҳәа илҳәеит Кристина Озган.
Уи иара убас иҟоу аизыҟазаашьақәа рыҿиара иазырханы аинвестициатә климат аиӷьтәра иазку актуалтә мшхәаԥштә шынагӡахо, насгьы апотенциалтә инвесторцәа – аилазаарақәа ааглыхреи атуризми русхкқәа ирыдҳәалоу аперспективра злоу апроектқәа рылахәхара адгылара шаҭахо азы агәрагара шлымоу аалырԥшит.
Ареспублика Башкортосҭан – аинвестивтә активреи ааглыхреи рыҩаӡара аганахьала Урыстәыла иԥхьагылоу арегионқәа ируакуп. Уи анефтьаалыҵқәа аус рыдулареи рҭыжьреи рганахьала актәи аҭыԥ ааннакылоит. Абылтәы-енергетикатә комплекси анефтьусдуларатә ааглыхреи рнаҩс арегион аҿы ахимиатә аглыхрагьы ибзианы ишьақәгылоуп, иара убас амашьынаргылареи абнатә ааглыхреи убасҵәҟьа аҩаӡара ҳаракы аҿы иҟоуп.
Аиԥылра ахыркәшамҭаз Башкортосҭан аделегациа ахаҭарнакцәеи Кристина Озгани аекономика Аминистрра ахаҭарнакцәеи еицны Зҭакԥхықәра Ҳәаақәҵоу Аилазаара «Аԥсны аҩқәеи аӡқәеи» анаплакқәа ирҭааразы амҩа иқәлеит.
