Аҟәа. Хәажәкырамза 31, 2023 шықәса. Аԥсныпресс. Хәажәкырамза 30 рзы, Урыстәыла адәныҟатәи аусқәа Рминистрра аҿы имҩаԥысит Урыстәылатәи адәныҟаполитикатә аусқәа рхылаԥшырҭа ахада ихаҭыԥуаҩ Михаил Галузини Аԥсны адәныҟаполитикатә усқәа рхылаԥшырҭа ахада ихаҭыԥуаҩ Иракли Ҭыжәбеи реиԥылара, ҳәа адырра ҟанаҵоит Аԥсны адәныҟатәи аусқәа Рминистрра аофициалтә саит.
Аԥснытәи аган аҟынтәи аиԥылара иара убас далахәхеит Урыстәылатәи Афедерациа иҟоу Аԥсны Ацҳаражәҳәаҩ Алхас Кәыҵниа.
Аиԥылара аҿы аганқәа мшаԥымза 4-5, 2023 шықәса рзы имҩаԥысраны иҟоу Кавказнҭыҵ аҭышәынтәалареи ашәарҭадареи рышьақәыргылара азы Жәларбжьаратәи Женеватәи аилацәажәарақәа изаамҭанытәиу араунд амшхәаԥштә зҵаарақәа ирылацәжәеит.
Аиԥылара иалахәыз ганкахьала Қырҭтәылеи Аԥсни, даҽа ганкахьала Қырҭтәылеи Аахыҵ Уаԥстәылеи рыбжьара аиуристә ҭакԥхықәра зҵоу, амчра ахархәара мап ацәкра азы Аиқшаҳаҭрақәа анапаҵыҩра шхымԥадатәиу ҩаԥхьа инаҵшьны иазгәарҭеит.
Иара убас Қырҭтәылеи Аԥсни ирыбжьоу аҳәынҭқарратә ҳәаа аделимитациеи анаҩсгьы адемаркациеи шхымԥадатәиу азгәаҭан.
Аԥсуа ган ахәҭакахьала аинцидентқәа разхьаԥшреи рыԥхьырҟәҟәаареи рзы Амеханизм (МПРИ) аусура ҩаԥхьа ахацыркра ишазхиоу даҽазныкгьы иазгәанаҭеит.
Аиԥылара иалахәыз агуманитартә зҵаарақәеи, иара убас егьырҭ, актуалра злоу азҵаарақәагьы ирылацәажәеит.
