Аҟәа. Хәажәкырамза 29, 2023 шықәса. Аԥсныпресс. Хәажәкырамза 28 рзы С.Иа.Ҷанба ихьӡ зху аҳәынҭқарратә драматә театр аҿы ажурналист, афилологиатә наукақәа ркандидат Екатерины Бебиа лышәҟәқәа ҩба – «Харада ахара зыдҵаз», «Ахашҭра аҟынтәи – ахьыӡ камшәара аҟынӡа» рӡыргара мҩаԥысит.
Аӡыргара еиҿнакааит атәыла акультура Аминистрра. Уи амҩаԥгара аҭыԥ алхрагьы машәыршақә иҟамлаӡеит. 1937 шықәсазы атеатр азал аҟны имҩаԥган 13-ҩык аԥсуа интеллигенциеи аполитикатә елитеи рхаҭарнакцәа рус аӡбара.
Екатерина Бебиа лышәҟәқәа рҿы 300-ҩык инарзынаԥшуа ауаа рлахьынҵа атәы еиҭалҳәоит. Арҭ ашәҟәқәа рҭыжьразы ажурналист аинформациа аизгара даҿын 40-шықәса инареиҳаны.
Актәи ашәҟәы «Харада ахара зыдҵаз» ақыҭа «Лыхны» иалҵыз, арепрессиа иақәыршәаз ирызкызҭгьы, аҩбатәи ашәҟәы «Ахашҭра аҟынтәи – ахьыӡ камшәара аҟынӡа» аҿы быжь қыҭак – Дәрыԥшь, Ҟәланырхәа, Аҷандара, Тамшь, Кәтол, Џьгьиарда, Ӷәада рҟынтәи арепрессиақәа ирықәыршәаз ирызку аматериалқәа арбоуп.
Ашәҟәқәа рӡыргара рхы аладырхәит аполитикцәа, аҵарауаа, ақыҭақәа Дәрыԥшь, Лыхны, Ҟәланырхәа, Ӷәада, Тамшь, Кәтол, Џьгьарда ахаҭарнакцәа, иара убас арепрессиақәа раан иҭархаз рҭынхацәа. ***.
