Аҟәа. Хәажәкырамза 29, 2023 шықәса. Аԥсныпресс. Имҩԥысит Ауаажәларратә Палата VI ааԥхьара раԥхьатәи апленартә еилатәара. Араҟа иалхын Ауаажәларратә Палата амаӡаныҟәгаҩи амаӡаныҟәгаҩ ихаҭыԥуаҩцәеи.
Ауаажәларратә Палата амаӡаныҟәгаҩыс ҩаԥхьа далххеит Гәыли Кьычба. Амаӡаныҟәгаҩ лхаҭыԥуаҩцәас иалххеит Витали Смыр, Алеқсандр Страничкин, Низам Хапати Изольда Ҳагбеи.
Ауаажәларратә Палата алахәыла Сократ Џьынџьал ажурналистцәа дрыҿцәажәо актәи аилатәара аихшьаалақәа дрыхцәажәеит.
«Убас иҟалеит, сара Ауаажәларратә Палта ааԥхьарақәа зегьы рлахәылас сыҟан. Иубаратәы иҟоуп атәыла Ауаажәларратә Палата аусура ахь ринтерес ессаира ишазҳауа. Уи арҵабыргуеит ауаажәларратә еиҿкаарақәеи аполитикатә партиақәеи рыла Ауаажәларратә Палата аилазаара ахь зыдгалара мҩаԥгаз акандидатцәа рхыԥхьаӡара. 11 ҭыԥ ахь иадгалан 42-ҩык. Аконкурс ду ыҟан, уи ауааԥсыра Ауаажәларратә Палата еиԥш иҟоу ауаажәларратә еилазаара аинститут аусура ишазҿлымҳау аанарԥшуеит. Иахьа актәи аилатара мҩаԥысит, далххеит амаӡаныҟәгаҩ», – ҳәа иҳәеит Сократ Џьынџьал.
Иара ишазгәеиҭаз ала, ҩ-кандидатурак ықәыргылан - Давид Ԥлиеи Гәыли Кьчбеи. «Аҩ-кандидатурак иҭышәынтәалоу аҭагылазаашьа аҿы ирыхәаԥшит.
Акандидатцәа рҩыџьагьы еиҟараны абыжьқәа роуит, аха Давид Ԥлиа ус еиҳа ииашахоит ҳәа иԥхьаӡаны икандидатура ықәигеит. Аха иара Апалата аҿы аус иулоит, уимоу акомиссиа ҿыц напхгарагьы аиҭалоит. Уи аԥҵаразы апленартә еилатәара аҿы аԥшьгара ҟазҵазгьы иара иоуп. Ҳара иалххаз амаӡаныҟәгаҩи уи ихаҭыԥуаҩцәеи ҳрыдгылоит, ҳазегьы ҳахшыҩи ҳамчи еилаҵаны аус ааулоит», - ҳәа иҳәеит Сократ Џьынџьал.
Уи иажәақәа рыла, Ауаажәларратә Палата аилазаара ҿыц аҿы ԥыхьатәи ааԥхьараҿы аус зуаз 13-ҩык ыҟоуп, егьырҭ 23-ҩык Апалата аилазаара ҿыц иалалаз роуп», - ҳәа иажәа хыркәшо иҳәеит Сократ Џьынџьал.
