Иарбоу аҭҵаарақәа акомплекстә ҟазшьа рыҵоуп: адгьыли уаҟа изызҳауа аҵиаақәеи рыхкқәа ргареи ранализ амҩаԥгареи рнаҩс, ари араион аҿы иҟоу арадиациа аҩаӡареи аҭҵаара ахьымҩаԥысуа азааигәара иҟоу аӡеизакырҭа аҟынтәи аӡы ахки ргәаҭарагьы мҩаԥган.

«Адгьыл ахкы аҭҵараан ҳара иара убас уи иалоу арацәаҵәыҵәытә газ аинтенсивра аҩаӡарагьы гәаҳҭоит, уи раԥхьаӡа иргыланы адгьыл абиологиатә активра иарбаганы иҟоуп. Аинтенсивра, аемиссиа CO2, мамзаргьы, уи даҽакала ишырҳәо еиԥш, «адгьыл ааԥсыԥлагаҩагара», аиҳарак амикроцәеижьқәа русура иадҳәалоуп. Апортативтә газоанализатор ахархәарала, иарку акамерақәа рметод ала, ҳара иарбоу адгьыл ахкы иаҷыдаҟазшьаны иҟоу, аха убри аан ҳара ҳрегион аҿы аламала иуԥымло, арацәаҵәыҵәытә газ ахылҵра аинтенсивра ашәара мҩаԥаагоит», - ҳәа имҩаԥысуа аусура дахцәажәо иазгәалҭеит Урыстәыла Анаукақәа Ракадемиа Асубтропикатә наукатә центр агеоекологиеи аԥсабаратә процессқәеи рлабораториа анаукатә усзуҩ еиҳабы Елена Рогожина.

Ироуа адыррақәа адгьылҟаԥшь иамоу абиологиатә активра аилкаареи егьырҭ адгьылхқәа ирҿырԥшны агәаҭареи антрополигиала зыхкеиҭаку адгьылқәа рыҭҵаараан ауаҩы аԥсабара иаиҭо аныра ахьынӡанаӡо аилкаареи рзы алшара аԥырҵоит.

Аусурақәа рымҩаԥгараҿы активра ацхыраара ҟарҵон Аԥсны анаукақәа Ракадемиа ахаҭарнакцәа. Араҟа ааигәа аҩганк алархәны анаукатә конференциа мҩаԥысит.  Уи аҳәаақәа ирҭагӡаны, ҩ-ҳәынҭқаррак рҵарауаа рԥышәеимадара мҩаԥысит, иара убас ишьақәгыларц зылшо анаҩстәи русеицура азы атема ҿыцқәа алкаахеит.

«Сара даара гәахәарыла исыдыскылоит ҳнаукатә центри Аԥсны анаукақәа Ракадемиеи аҵарадырреи аҭоурых-культуратә ҭынха ахьчареи русхкы анаҩсгьы, аҭҵаара-дырратә усурақәа реицынагӡареи ахьзалыршахо. Аԥсны иҷыдоу агеографиатәи аклиматтәии ҭагылазаашьақәа инарымаданы, еиуеиԥшым анаукатә усхкқәа рҿы аексперименталтә ҭҵаарақәа рзы акыр аинтерес зҵоу ҭыԥны иаанхоит», – ҳәа иазгәеиҭеит Урыстәыла Анаукақәа Ракадемиа Асубтропикатә наукатә центр адиректор, УАР академик Алеқсеи Рындин. https://subtropras.ru/2023/03/rossijskie-uchyonye-pristupili-k-izucheniyu-areala-razvitiya-krasnozyomov-v-abhazii/