Аҟәа. Хәажәкырамза 22, 2023 шықәса. Аԥсныпресс. Мшаԥымза 4 инаркны 7 аҟынӡа Аахыҵ Уаԥстәыла имҩаԥысраны иҟоуп Аԥсны акультура амшқәа. Цхьынвал ақалақь аҿы Аҳәынҭқарратә аҿар ртеатри Аԥсны зҽаԥсазтәыз жәлар рыкәашареи рышәаҳәареи рзы Аҳәынҭқарратә ансамбли ықәгылараны иҟоуп.
Аԥсны акультура Аминистрра апресс-маҵзура иҟанаҵо адыррақәа рыла, Аԥсны акультура амшқәа раартра иазку аныҳәатә усмҩаԥгатәқәа хацыркхоит мшаԥымза 5 рзы. К. Л. Хетагуров ихьӡ зху Аҳәынҭқарратә драматә театр аҟны ахәаԥшцәа идырбахоит Аԥсны Аҳәынҭқарратә аҿар ртеатр инарыгӡо Аԥсны жәлар рышәҟәыҩҩы Шьалодиа Аџьынџьал иажәабжьқәа рмотивқәа рыла иқәыргылоу аспектакль «Третий день войны».
Мшаԥымза 6 рзы Аԥсны зҽаԥсазтәыз жәлар рыкәашареи рышәаҳәареи рзы аҳәынҭқарратә ансамбли аԥсуа естрада артистцәеи рықәгылара азԥхьагәаҭоуп.
«Ари ҳатрадициақәа, ҳҭоурых, ҳкультура азнагара азы зеиӷьаҟам лшароуп. Ҳара аҩганктәи акультуратә усмҩаԥгатәқәа рымҩаԥгара азы ҳаиқәшаҳаҭхахьан, абар сынтәа уи зегьы анагӡарра ҳгәы иҭоуп. Мшаԥымза 4 -7 рзы ҳара Аԥсны акультура Амшқәа мҩаԥаагоит, анаҩс аҭак аҳасабала Аԥсны имҩаԥысуеит Аахыҵ Уаԥстәыла акультура Амшқәа», – ҳәа иазгәеиҭеит Аԥсны акультура аминистр Даур Ақаҩба.
Даур Ақаҩба иара убас аиашьаратә республикақәа рыбжьара акультуратә еимадареи агуманитартә диалоги рҳәаақәа рырҭбаара аҿы акультура Амшқәа рҵакы ахадара инаҵшьны иазгәеиҭеит.
