Аҟәа. Хәажәкырамза 13, 2023 шықәса. Аԥсныпресс. Аԥсны ашәҟәыҩҩцәа Реидгыла 2022 шықәсазы аусура аихшьаалақәа рыҟаҵара иазкын хәажәкырамза 10 рзы имҩаԥысыз арҿиаратә еиҿкаара апрезидиум аилатәара.
Аҳасабырбатә ажәахә ҟаҵо дықәгылеит Аидгыла ахантәаҩы Вахтанг Абхазоу. Ашәҟәыҩҩцәа Реидгыла апрезидиум иара убас 2023 шықәсазы аусура аплан шьақәнарӷәӷәеит.
Абарҭ ахырхарҭақәа рыла аусура арӷәӷәара азы аӡбамҭа рыдыркылеит: Ашәҟәыҩҩцәа Реидгыла аҟны иҟоу Алитературатә Клуб аусура;
алитератор ҿарацәеи ареспублика аҵараиурҭақәа жәпакы рҿы еиҿкаау алитературатә гәыԥқәеи русура;
иреиӷьу арҿиамҭақәа ацәаҳәаҵатәи азҟазаратәи аиҭагара;
ашәҟәыҩҩцәа рырҿиаратә ҭынха аизгареи аиқәырхареи;
Аԥсны Ашәҟәыҩҩцәа Реидгыла афотоархив аԥҵара.
«Ҳазҭалаз ашықәс аԥсуа шәҟәыҩҩцәа рзы аҵак ду змоу шықәсны иҟоуп. Ааԥынра, 1933 шықәса рзы иаԥҵаз атәыла ижәытәӡоу арҿиаратә еиҿкаарақәа иреиуоу Ашәҟәыҩҩцәа Реидгыла 90-шықәса ахыҵуеит. Ари аиубилеитә рыцхә ҭагалан азгәаҭара азы аӡбамҭа рыдыркылеит. Убри инамаданы атәыла алитературатә ԥсҭазаара азы еиҳа зҵазкуа ахҭысқәа алкаахеит. Урҭ ирызкхоит араионтә, ақалақьтә, ареспубликатә усмҩаԥгатәқәа жәпакы», – ҳәа Аԥныпресс акорреспондент диҿцәажәо еиҭеиҳәеит Вахтанг Абхазоу.
Ашәҟәыҩҩцәа Реидгыла 2023 шықәса аԥсуа литература иашықәсны ирыларҳәеит. Аиубилеитә усмҩаԥгатәқәа аҳәаақәа ирҭагӡан иазԥхьагәаҭоуп: алитературатә еиԥыларақәа, апоезиа ахәылԥазқәа, астол гьежьқәа, аконкурсқәа, афестивальқәа, ҿыц зырҿиаратә усура иалаго алитераторцәа рзы асеминарқәа, афотоцәыргақәҵақәа, уҳәа убас ирацәаны аусмҩаԥгатәқәа.
Аиубилеи азгәаҭара инамаданы апоезиа аколлективтә еизгақәа (аԥсуа бызшәеи аурыс бызшәеи рыла иҭыжьу), ажәабжьқәа реизга (аурыс бызшәала иҭыжьу), иара убас абуклет «Аԥсны Ашәҟәыҩҩцәа Реидгыла– 90 шықәса».
Ашәҟәыҩҩцәа Реидгылеи Ашәҟәыҩҩцәа Рассоциациеи 1992–1993 шш. Аԥсны жәлар рџьынџьтәылатәи еибашьра аҿы Аиааира агара Амш 30- шықәса инамаданы аџьынџьтәылатәи еибашьра иазку ажәеинраалақәа реизга еиқәыршәахеит.
